Bakı, 1 aprel, AZƏRTAC

Bu gün Azərbaycan Respublikasının Əməkdar bədən tərbiyəsi və idman xadimi Elçin Hidayət oğlu Zeynalov 76 yaşını qeyd edir.
AZƏRTAC xəbər verir ki, bir çox məşhur güləşçilərimizin şəxsi məşqçisi olan Elçin Zeynalov 1948-ci ildə Gəncə şəhərində anadan olub. 1968-ci ildə Kirov adına Bədən Tərbiyəsi İnstitutunun qiyabi şöbəsinə daxil olub. Hazırda sərbəst güləş idman növü üzrə məşqçilik fəaliyyətini davam etdirən yubilyar Gəncə şəhər yığma komandasının baş məşqçisi vəzifəsində çalışır. Bir çox yetirməsi Dünya, Avropa çempionatlarının, Dünya Kubokunun qalibi və mükafatçılarıdır. Bunlardan Abil İbrahimov, Rza Xəlilov, Vüsal Həsənov və Rəhim Əliyevi misal göstərmək olar. Elçin Zeynalovun yetirməsi Toğrul Əsgərov 2012-ci ildə London Olimpiya Oyunlarının qızıl medalını qazanıb, 2016-cı il Rio de-Janeyro Olimpiya Oyunlarında gümüş medala yiyələnib.
Güləşin inkişafındakı xidmətlərinə görə Elçin Zeynalov 1973-cü ildə SSRİ idman ustası, 1989-cu ildə Əməkdar məşqçi adlarına layiq görülüb.
Azərbaycan Prezidentinin 25 dekabr 2008-ci il Sərəncamı ilə “Əməkdar bədən tərbiyəsi və idman xadimi” fəxri adı, 31 avqust 2012-ci il tarixli Sərəncamı ilə "Şöhrət" ordeni, 29 iyun 2015-ci il tarixli Sərəncamı ilə “Azərbaycan Respublikası Prezidentinin fəxri diplomu” və 1 sentyabr 2016-cı il tarixli Sərəncamı ilə "Tərəqqi" medalı ilə təltif olunub.
Elçin Zeynalov doğum günü ilə bağlı təəssüratlarını AZƏRTAC-la bölüşüb. O bildirib ki, güləşin inkişafı uğrunda çəkdiyi əziyyətlər bu gün öz bəhrəsini verib: “ Ümummilli Lider idman ictimaiyyətinə hər zaman qayğı ilə yanaşırdı. Yetişdirdiyim idmançıların əldə etdiyi nailiyyətlər Ulu Öndər Heydər Əliyev tərəfindən yüksək qiymətləndirilirdi. O, bu uğurlara görə məni də təltif etdi. Çox qürurverici haldır ki, tələbələrim hər zaman beynəlxalq arenada bayrağımızı qaldırıb, himnimizi səsləndiriblər. Bir sözlə, tarix yazıblar. Əməklərimin qarşılığını artıqlaması ilə almağım məni çox sevindirir. Güləş idman növü bu gün də intibah dövrünü yaşayır. İdmançılarımız iştirak etdikləri yarışlarda tarix yazırlar, uğurlara imza atırlar. Prezident İlham Əliyevə və birinci xanım Mehriban Əliyevaya ölkədə idmanın inkişafına və idmançılara göstərdikləri diqqət və qayğıya görə sonsuz minnətdarlığımı bildirirəm”.