Gəncə, 20 avqust, AZƏRTAC

Avqust-sentyabr ayları meyvə ağaclarının növbəti vegetasiya dövrünə hazırlanması, onların qışa davamlılığının artırılması və gələn ilin məhsuldarlığının təmin edilməsi baxımından mühüm dövr hesab olunur. Mütəxəssislər bu aylarda bağlarda görülən işlərin düzgün və vaxtında aparılmasının ağacların sağlamlığına, məhsulun keyfiyyətinə və növbəti ilin məhsuldarlığına birbaşa təsir etdiyini bildirirlər.
Dövlət Aqrar Universitetinin dosenti Hüseyn İdrisov AZƏRTAC-ın bölgə müxbirinə açıqlamasında bildirib ki, meyvə bağlarında yayın sonu və payızın əvvəllərində əsas diqqət ağacların vegetasiya vəziyyətinin qiymətləndirilməsinə, suvarma və qidalanmanın düzgün təşkilinə, xəstəlik və zərərvericilərə qarşı mübarizəyə yönəldilməlidir.
Onun sözlərinə görə, məhsul yığımından sonra ağacların qulluqdan kənarda saxlanılması düzgün yanaşma deyil. Əksinə, bu dövrdə ağaclar növbəti ilin məhsulu üçün fizioloji hazırlıq mərhələsinə keçir.
“Avqust və sentyabr aylarında meyvə ağaclarında vegetativ inkişaf tədricən zəifləsə də, bitkinin daxilində mühüm fizioloji proseslər davam edir. Bu mərhələdə ağacın kifayət qədər qida maddəsi toplaması və toxumaların yetişməsi onun qışa davamlılığı üçün böyük əhəmiyyət daşıyır. Ona görə də məhsul yığımından sonra bağın aqrotexniki vəziyyəti diqqətlə qiymətləndirilməli və növbəti vegetasiya ili üçün zəruri tədbirlər həyata keçirilməlidir”, – deyə dosent Hüseyn İdrisov qeyd edib.
Həmçinin payız yaxınlaşdıqca bağın sanitar vəziyyətinin yaxşılaşdırılması xüsusi əhəmiyyət kəsb edir. Qurumuş və xəstə budaqların təmizlənməsi, ağac diblərinin və cərgəaralarının alaq otlarından azad edilməsi, tökülmüş yarpaq və meyvə qalıqlarının idarəolunması növbəti vegetasiya dövründə xəstəlik və zərərvericilərin yayılma riskini azaltmağa kömək edir.
Qeyd edək ki, iqlim şəraitinin dəyişməsi, yüksək temperatur və su çatışmazlığı meyvə bağlarında aqrotexniki tədbirlərin daha dəqiq planlaşdırılmasını zəruri edir. Mütəxəssislər fermerlərə qulluq tədbirlərini yalnız təqvimə əsasən deyil, konkret bağın torpaq-iqlim şəraiti, ağacların inkişaf vəziyyəti və sort xüsusiyyətləri nəzərə alınmaqla həyata keçirməyi tövsiyə edirlər.
Beləliklə, avqust-sentyabr aylarında bağlarda aparılan düzgün qulluq işləri ağacların sağlamlığının qorunmasına, qış dövrünə daha yaxşı hazırlaşmasına və növbəti ildə yüksək və keyfiyyətli məhsul əldə edilməsinə mühüm zəmin yaradır.

_{Müxbir - Elcan Məmmədov}