Berlin, 3 avqust, AZƏRTAC
Almaniyanın aparıcı fond indeksi DAX həftənin ilk günündə tarixi maksimumu yeniləyib.
AZƏRTAC “Spiegel” nəşrinə istinadla bildirir ki, indeks ticarətin açılışında 1,11 faiz artaraq 25.912,59 bəndə yüksəlib və iyulun əvvəlində qeydə alınmış əvvəlki rekordu (25.900) geridə qoyub.
Bu yüksəlişə ABŞ ilə İran arasında gərginliyin azalacağına dair gözləntilər təsir göstərib. ABŞ Prezidenti Donald Trampın İranla yeni danışıqların keçiriləcəyinə və genişmiqyaslı hərbi əməliyyatın ləğv edilməsinə dair açıqlaması dünya bazarında neftin qiymətlərinin ucuzlaşmasına, inflyasiya və faiz dərəcələrinin artacağı ilə bağlı narahatlıqların zəifləməsinə səbəb olub.
ABŞ və Avropa şirkətlərinin rüblük maliyyə hesabatlarının gözləntiləri üstələməsi, həmçinin texnologiya sektorunda, xüsusilə “Microsoft” və “Amazon” şirkətlərinin güclü maliyyə nəticələri də investorların risk iştahasını artıraraq DAX indeksinin rekord səviyyəyə yüksəlməsinə əlavə dəstək verib.