Brüssel, 3 avqust, AZƏRTAC

Belçika yeni isti hava dalğası ilə əlaqədar olaraq gücləndirilmiş xəbərdarlıq tədbirləri tətbiq edib. Ölkə sakinlərinə bununla bağlı ehtiyat tədbirləri görmək tövsiyə olunub.
AZƏRTAC xəbər verir ki, Kral Meteorologiya İnstitutu gözlənilən yüksək temperatur səbəbindən əksər əyalətlər üçün narıncı hava xəbərdarlığı elan edib.
Sinoptiklər yaxın günlərdə temperaturun 30 dərəcə Selsidən çox ola biləcəyini və bunun da xüsusilə yaşlılar, uşaqlar və xroniki xəstəlikləri olanlar üçün sağlamlıq risklərinin artacağını proqnozlaşdırırlar.
Hakimiyyət orqanları sakinlərə daha çox su içməyi, günün ən isti saatlarında fiziki fəaliyyəti məhdudlaşdırmağı tövsiyə edib. Səhiyyə və sosial xidmətlər yüksək hazırlıq vəziyyətinə gətirilib və şərait daimi nəzarət altındadır.