Stokholm, 6 iyun, AZƏRTAC

İsveçdə parlament seçkilərinə 100 gün qalmış seçicilərin prioritetlərində nəzərəçarpacaq dəyişikliklər baş verir.
AZƏRTAC xəbər verir ki, “Ipsos” şirkətinin keçirdiyi yeni sorğunun nəticələrinə əsasən, immiqrasiya və inteqrasiya məsələləri cəmiyyət üçün ən vacib problemlər sırasında ikinci yerə yüksəlib. Beləliklə, bu mövzuya marağın illərdir davam edən azalman tendensiyası pozulub. Mütəxəssislər bunu son vaxtlar yeniyetmələrin deportasiyası ətrafında aparılan müzakirələrlə əlaqələndirirlər. Hakim Tidö koalisiyası qanunvericiliyə dəyişiklik etməyi təklif edib ki, valideynləri vasitəsilə yaşayış icazəsi almış gənclər yetkinlik yaşına çatdıqdan sonra deportasiya edilməsin və 21 yaşınadək İsveçdə qala bilsinlər. Analitiklərin fikrincə, miqrasiya mövzusuna marağın artması ilk növbədə cəmiyyətin həmin deportasiyalara reaksiyasını əks etdirir.
Eyni zamanda, iqtisadi vəziyyətlə bağlı narahatlıq da artır. Fars körfəzindəki müharibə, yanacaq qiymətlərinin yüksəlməsi və iqtisadi proqnozların pisləşməsi fonunda İsveç iqtisadiyyatı seçicilərin prioritetləri sırasında altıncı yerə yüksəlib. Hökumət əhali və biznes üçün çoxmilyardlı dəstək tədbirləri elan edib. Bu tədbirlər arasında yanacaq vergilərinin azaldılması və ictimai nəqliyyatın ucuzlaşdırılması da var. Bununla belə, bəzi iqtisadçılar bu addımları ifrat hesab edirlər.
İsveçlilər üçün əsas məsələ səhiyyə olaraq qalır. Siyasi müzakirələrin mərkəzində, xüsusilə də, Tidö hökumətinin fəaliyyəti dövründə azalan tibbi yardıma növbələr dayanır. Bu mövzu qadınları kişilərlə müqayisədə daha çox narahat edir. Bundan əlavə, səhiyyə məsələləri kənd yerlərində və kiçik yaşayış məntəqələrində yaşayanlar üçün iri şəhərlərin sakinlərinə nisbətən daha böyük əhəmiyyət kəsb edir.
İkinci yerdə miqrasiya və inteqrasiya məsələləridir. Üçüncü yeri isə cinayətkarlıq və təhsil bölüşür. Ölkədə silahlı zorakılıq hallarının azalmasına baxmayaraq, cinayətkarlıq problemi hələ də bir çox seçici üçün əsas məsələlərdən biri olaraq qalır.
İqlim və energetika məsələləri reytinqdə beşinci yeri qoruyub saxlayıb. Enerji təhlükəsizliyi və yanacaq qiymətlərinin artması ilə bağlı fəal müzakirələrə baxmayaraq, son dövrdə bu mövzuların seçicilər üçün əhəmiyyətində ciddi dəyişiklik qeydə alınmayıb.