Bakı, 14 avqust, AZƏRTAC

İnnovasiya və Rəqəmsal İnkişaf Agentliyi ilə Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi arasında birgə əməkdaşlığa dair memorandum imzalanıb.
İnnovasiya və Rəqəmsal İnkişaf Agentliyindən AZƏRTAC-a bildirilib ki, sənədi qurumun sədr əvəzi İnarə Vəliyeva və Dövlət Məşğulluq Agentliyinin İdarə Heyətinin sədri Mustafa Abbasbəyli imzalayıblar.
“Technest” təqaüd proqramı çərçivəsində imzalanan memoranduma əsasən, tərəflər işaxtaran və işsiz şəxslərin proqrama cəlb edilməsi, iştirakçılar üçün karyera planlaması, proqrama cəlb edilən şəxslərin işlə təminatına dəstək verən işəgötürənlərlə əməkhaqqının birgə maliyyələşməsi proqramı üzrə əməkdaşlıq edəcək. Həmçinin razılaşmaya əsasən layihə iştirakçılarına özünüməşğulluq proqramı çərçivəsində də dəstək göstəriləcək. Bundan başqa, tərəflər arasında qarşılıqlı təcrübə mübadiləsi aparılacaq, proqrama cəlb olunan şəxslər üçün Agentliyin Peşə Hazırlığı Mərkəzlərində peşə kursları təşkil ediləcək.
Qeyd edək ki, “Technest” təqaüd proqramı 2021-ci ilin oktyabr ayından Rəqəmsal İnkişaf və Nəqliyyat Nazirliyinin təşəbbüsü ilə İnnovasiyalar və Rəqəmsal İnkişaf Agentliyinin nəzdində yaradılıb. Məqsəd ölkədə İKT sahəsində kadr bankının yaradılması prosesinə töhfə vermək və əmək bazarındakı kadr ehtiyaclarını qarşılamaqdır.