Bakı, 25 iyul, AZƏRTAC

İllinoys Universitetinin alimləri MIND pəhrizinin məktəbyaşlı uşaqlarda diqqəti yaxşılaşdırdığını müəyyən ediblər.
AZƏRTAC xəbər verir ki, tədqiqatın nəticələri Amerika Qidalanma Cəmiyyətinin əsas illik toplantısı olan “NUTRITION 2023”-də təqdim edilib.
MIND pəhrizi əvvəlcə böyüklərdə idrak qabiliyyətinin azalmasının qarşısını almaq üçün hazırlanmışdı. O, yüksək qan təzyiqi olan insanlar üçün Aralıq dənizi pəhrizini və DASH pəhrizini birləşdirir.
MIND pəhrizinə beyin sağlamlığını yaxşılaşdıran təzə meyvələr, tərəvəzlər və paxlalılar, o cümlədən lobya, mərcimək və noxud, həmçinin göyərti və giləmeyvə daxildir.
Yeni araşdırmada 7-11 yaş arası 85 uşağın məlumatlarından istifadə edilib. Yeddi gün ərzində onlar MIND pəhrizinə və ya sağlam qidalanmanın ümumi prinsiplərinə əsaslanan “HEI-2015” (Sağlam Qidalanma İndeksi) pəhrizinə əməl ediblər. Onlar, həmçinin diqqət və sürətli reaksiya tələb edən tapşırıq yerinə yetiriblər. Tədqiqatçılar “HEI-2015” pəhrizinin deyil, MIND pəhrizinin tapşırıq performansını yaxşılaşdırdığını aşkar ediblər.
"Bu, MIND pəhrizinin uşaqların yaddaş inkişafını yaxşılaşdıra biləcəyini göstərir ki, bu da məktəbdə uğur qazanmaq üçün vacibdir", - alimlər vurğulayıblar.