Bakı, 8 iyul, AZƏRTAC

İnnovasiya və Rəqəmsal İnkişaf Agentliyinin (İRİA) nümayəndəsi Ayaz Həsənquluyev 333 iştirakçı arasından uğurlu namizədlərlə birlikdə “Yüksəliş” müsabiqəsinin final mərhələsinə yüksəlib.
AZƏRTAC Agentliyə istinadla xəbər verir ki, 13 min 474 nəfərin rəqabət apardığı müsabiqədə yalnız 109 iştirakçı final mərhələsinə vəsiqə qazanıb.
Ümumilikdə Bakı üzrə 73, regionlar üzrə 36 iştirakçı final mərhələsinə keçib. Onlardan 87-si kişi, 22-si qadındır. Finalçılar arasında beynəlxalq, özəl və dövlət şirkətlərində, həmçinin QHT-də çalışan namizədlər yer alır. Finalçılar aralığında 21-30 yaşarası iştirakçılar üstünlük təşkil edir. Namizədlərdən 66-sı ötən illərin “Yüksəliş” müsabiqəsi iştirakçılarıdır.
“Yüksəliş” müsabiqəsinin final mərhələsi iyulun 15-17-də “Bakı Ekspo Mərkəzi”ndə keçiriləcək. Final mərhələsinə keçid balı 17 bal təyin olunub.
Qeyd edək ki, “Yüksəliş” müsabiqəsi Prezident İlham Əliyevin 2019-cu il 26 iyul tarixli Sərəncamına əsasən təsis olunub. Müsabiqə 5 mərhələdən ibarətdir. Dövlətimizin başçısı 2022-ci il dekabrın 20-də üçüncü “Yüksəliş” müsabiqəsinin keçirilməsi ilə bağlı Sərəncam imzalayıb.