Bərdədə soğan yığımına başlanılıb – qiyməti ucuzlaşacaq
Bərdə, 29 mart, Tahir Ağaməmmədov, AZƏRTAC
Bərdədə payızlıq soğanın yığımına başlanılıb. Soğanın kütləvi yığımı isə aprelin ortalarında həyata keçiriləcək. Təzə məhsulun bazarlara çıxışı bolluğa, bu isə öz növbəsində qiymətlərə təsir göstərəcək.
Qarabağ-Aran Soğan İstehsalçıları və İxracatçılar Assosiasiyasının sədri Vüqar Babayev AZƏRTAC-ın bölgə müxbirinə bildirib ki, ölkəmizdə soğan istehsalı daha çox Bərdə, Ağdam, Ağcabədi, Beyləqan və Tərtər rayonlarında həyata keçirilir. Yazlıq soğan fevral-mart aylarında, payızlıq soğan isə sentyabr ayında səpilir. Payızda əkilən soğanın yığımı aprel, may, iyun aylarında, yazda əkilən soğanın yığımı isə avqust ayında həyata keçirilir.
Payızlıq soğan əsasən Bərdə rayonunda becərilir. Hazırda payızlıq soğan sahələrində son becərmə işləri görülür – mineral gübrələr verilir, zərərvericilərə qarşı kimyəvi mübarizə aparılır. Sahələrin suvarılmasında son illər daha çox damla üsulundan istifadə edilir ki, bunun nəticəsində məhsuldarlıq yüksəlib.
“Hazırda bəzi fermerlər becərmə işləri ilə yanaşı, nübar soğan yığımına da başlayıblar. Bazarda bir kiloqram təzə soğanın qiyməti 90 qəpiyə təklif olunur. Soğanın kütləvi yığımına başlanandan sonra qiymətlərdə ucuzlaşma olacaq. İstehsal olunan məhsul xaricə ixrac edilərsə, fermerlər də mənfəət götürürlər”, - deyə V.Babayev bildirib.
Bərdə Rayon Statistika İdarəsindən bildirilib ki, martın 1-nə olan məlumata görə, 2023-cü ilin məhsulu üçün rayon ərazisində 674 hektar sahədə soğan əkilib. Ötən il isə 721 hektar sahədə soğan becərən bərdəli fermerlər sahələrdən 32090 ton məhsul götürüblər.
Ağstafada Aqrar İnnovasiya Festivalı çərçivəsində toxum sərgi-satış yarmarkası təşkil olunub
Bu il Oğuzun taxıl sahələrində orta məhsuldarlıq 30,9 sentner olub
Balakənli fermerlər 7819 hektar sahədə dən üçün qarğıdalı yetişdiriblər
Bu il Beyləqanda 23 min tondan çox pambıq istehsalı gözlənilir
Qəhvəyi mərmər bağacığını aşkar etmək məqsədilə Şəkinin kəndlərində 100 feromon tələ asılıb