Azərbaycan ilə Misir arasında bir sıra sahələrdə əməkdaşlıq imkanları müzakirə olunub
Bakı, 25 fevral, AZƏRTAC
Fevralın 25-də Azərbaycan və Misir arasında Hökumətlərarası iqtisadi, texniki və elmi əməkdaşlıq üzrə Müştərək Komissiyanın həmsədrləri, Azərbaycanın rəqəmsal inkişaf və nəqliyyat naziri Rəşad Nəbiyevlə Misirin beynəlxalq əməkdaşlıq naziri Rania Al-Maşat arasında ikitərəfli görüş keçirilib.
Rəqəmsal İnkişaf və Nəqliyyat Nazirliyindən AZƏRTAC-a bildirilib ki, görüşdə Müştərək Komissiyanın beşinci iclasının Azərbaycanla Misir arasında diplomatik əlaqələrin qurulmasının 30 illiyinə təsadüf etdiyi vurğulanıb. İki ölkə arasında iqtisadi və mədəni əlaqələrin yüksək səviyyədə olduğu qeyd edilib.
Azərbaycanla Misir arasında ticarət dövriyyəsinin həcminin 2021-ci ildə 5 dəfədən çox artmasından məmnunluq ifadə olunub. Əlavə edilib ki, ticarət həcminin daha da artırılması üçün real potensial mövcuddur.
Görüş zamanı ticarət həcminin və qarşılıqlı investisiyaların artmasında iş adamlarının xüsusi rol oynadığı bildirilib və bu baxımdan Komissiyanın iclası çərçivəsində Azərbaycan–Misir Biznes Forumunun təşkil edilməsinin əhəmiyyəti qeyd olunub.
Həmçinin ticarət, sənaye və qarşılıqlı investisiyaların təşviqi məsələləri ilə yanaşı, təhsil, mədəniyyət və turizm sahələrində əməkdaşlıq imkanlarına dair fikir mübadiləsi aparılıb.
“Azərkosmos” gələn il fevralda keçiriləcək “Beynəlxalq Kosmik Konvensiya 2024”də iştirak edəcək
Ölkənin informasiya təhlükəsizliyi və kibertəhlükəsizliyə dair Strategiyası təsdiq olunub - SƏRƏNCAM
Azərbaycan “Digitalisation and Channel Awards 2023” mükafatlandırılma mərasimində təmsil olunacaq
“Google” şirkətinin Bakı konfransına 1000-dən çox müraciət qeydə alınıb