“AzInTelecom”un təşəbbüsü ilə IT sahəsi üzrə ödənişsiz vebinar keçirilib
Bakı, 2 may, AZƏRTAC
Nəqliyyat, Rabitə və Yüksək Texnologiyalar Nazirliyinin tabeliyində fəaliyyət göstərən “AzInTelecom” MMC-nin təşəbbüsü, “Microsoft Azərbaycan” və “Kaspersky” şirkətlərinin iştirakı ilə “İKT əsaslarından bulud texnologiyalarına” adlı ödənişsiz maarifləndirici vebinar keçirilib.
Nazirlikdən AZƏRTAC-a bildirilib ki, vebinarın təşkilində əsas məqsəd xüsusi karantin rejimi dövründə tələbələrin, eləcə də müxtəlif peşə sahiblərinin İKT sahəsində, xüsusilə bulud texnologiyaları üzrə yeni biliklərə yiyələnməsinə şərait yaratmaqdır. Rəqəmsal platformada baş tutan tədbirdə təşkilatçılar informasiya texnologiyalarının, kibertəhlükəsizliyin əsasları, bulud texnologiyaları barədə təqdimatlarla çıxış ediblər.
Vebinarda “AzInTelecom”un Kommersiya departamentinin rəhbəri Ruslan Əliyev bildirib ki, IT sahəsi üzrə vebinarların keçirilməsi Azərbaycanda hər kəsi müasir dünya trendləri ilə uyğunlaşmağa həvəsləndirmək, rəqəmsal texnologiyalar barədə məlumatlandırmaq baxımından çox önəmlidir. O, bu təşəbbüsün faydalı nəticələrə səbəb olacağını söyləyib.
“Microsoft Azərbaycan” nümayəndəsi Qaçay Mirzəyev vebinar iştirakçılarına informasiya texnologiyaları və bu sektordakı yeniliklər haqqında ətraflı məlumat verib.
“Kaspersky”nin rəsmi təmsilçisi Müşfiq Məmmədov isə öz təqdimatında kibertəhlükəsizliyin vacib aspektlərindən bəhs edib.
Sonda çıxışçılar iştirakçıların suallarını cavablandırıblar.
Qeyd edək ki, “AzInTelecom” MMC tərəfindən bu kimi tədbirlərin yaxın gələcəkdə də təşkili nəzərdə tutulur.
“Azərkosmos” gələn il fevralda keçiriləcək “Beynəlxalq Kosmik Konvensiya 2024”də iştirak edəcək
Ölkənin informasiya təhlükəsizliyi və kibertəhlükəsizliyə dair Strategiyası təsdiq olunub - SƏRƏNCAM
Azərbaycan “Digitalisation and Channel Awards 2023” mükafatlandırılma mərasimində təmsil olunacaq
“Google” şirkətinin Bakı konfransına 1000-dən çox müraciət qeydə alınıb