Azərbaycan Dövlət
İnformasiya Agentliyi

A
A
A
Sazlamalar

Azərbaycanın Rəqəmsal Ticarət Qovşağı Estoniyada uğur qazanıb

Bakı, 16 sentyabr, AZƏRTAC

İqtisadi İslahatların Təhlili və Kommunikasiya Mərkəzinin (İİTKM) Rəqəmsal Ticarət Qovşağının meneceri Nicat Əsədli Estoniyanın Vormsi şəhərində təqdimat edib.
Mərkəzin mətbuat xidmətindən AZƏRTAC-a bildirilib ki, Rəqəmsal Dövlət Hakatonunda (Digital Nation Hackaton) Rəqəmsal Ticarət Qovşağının təqdimatı zamanı N.Əsədli dövlətlərarası transsərhəd elektron ticarətin aparılması, elektron imzaların qarşılıqlı tanınması və istifadəsi, Estoniya ilə Azərbaycan arasında elektron və mobil rezidentlər üçün yaradılması müzakirə olunan vahid məlumat platforması haqqında iştirakçılara məlumat verib. Azərbaycan dünyada ilk elektron və mobil imza təqdim edən ölkə kimi Estoniya rəsmiləri və tədbir iştirakçılarının diqqətini çəkib, əməkdaşlıq üçün ilkin müzakirələrin əsası qoyulub.
N.Əsədlinin təqdimatının əsas mövzusu Estoniya ilə Azərbaycanın elektron və mobil rezidentlərinin dövlət və özəl xidmətlərdən rahat istifadə edə bilməsi, müxtəlif biznes xidmətləri barədə asanlıqla məlumatlandırılması və xidmətlərin çeşidinin artırılmasının stimullaşdırılması üçün Rəqəmsal Ticarət Qovşağı və Estoniya e-Rezidentlik proqramı arasında sərhədlərarası mərkəzləşdirilmiş elektron resursun yaradılması olub. Bu resurs dünyada elektron və mobil rezidentlərə vahid mərkəzdən müxtəlif dövlət və özəl xidmətlərinin göstərildiyi ilk təşəbbüsdür. Resursun ilkin prototipi tədbir çərçivəsində təqdim edilib və iştirakçılar tərəfindən böyük marağa səbəb olub.
Estoniyanın Rəqəmsal Dövlət Hakatonuna ABŞ, Böyük Britaniya, Almaniya, İspaniya, İsveçrə, İtaliya, Türkiyə, Hindistan, Rusiya, Ukrayna və Gürcüstan da daxil olmaqla 18 ölkədən 200-dən çox iştirakçı qatılıb.

İKT 2019-09-16 14:04:00