Bu il ilk dəfə Beyləqanda innovativ texnologiya ilə pambıq becəriləcək
Hər hektardan orta hesabla 50 sentnerdən çox pambıq istehsalı gözlənilir
Beyləqan, 22 fevral, Tahir Ağaməmmədov, AZƏRTAC
Bu il ilk dəfə olaraq Beyləqan rayonunun Mil Təcrübə Stansiyasında pambığın innovativ texnologiya ilə becərilməsi həyata keçiriləcək. Pambıq ənənəvi becərmədən fərqli olaraq, tirəyə əkin üsulu ilə becəriləcək, damlama suvarma sistemi ilə suvarılacaq. Pambığın becərilməsində innovativ aqrotexniki tədbirlər həyata keçiriləcək. Məqsəd yeni texnologiyanı tətbiq etməklə pambığın məhsuldarlığını yüksəltməkdir. Yeni texnologiyanın tətbiq edildiyi nümunəvi tarlanın hər hektarından orta hesabla 50 sentnerdən yuxarı pambıq istehsal ediləcəyi gözlənilir.
AZƏRTAC-ın bölgə müxbiri xəbər verir ki, pambığın becərilməsində yeni texnologiyanın tətbiq ediləcəyi Beyləqan rayonunun Mil Təcrübə Stansiyasında Kənd Təsərrüfatı Nazirliyinin, Beyləqan Dövlət Aqrar İnkişaf Mərkəzinin, pambıqçılıq şirkətlərinin nümayəndələrinin, Türkiyədən gəlmiş mütəxəssislərin və pambıqçılıqla məşğul olan fermerlərin iştirakı ilə tarla günü keçirilib. Pambıq əkiləcək 7 hektar sahə yeni texnika və aqreqatların köməyi ilə səpinə hazır vəziyyətə gətirilib.
Məlumat verilib ki, ərazidə Türkiyədən gətirilmiş, həmçinin yerli pambıq sortları müasir texnologiyanın tətbiqi ilə becərilərək sınaqdan keçiriləcək. Bölgə üçün müəyyənləşən məhsuldar pambıq sortları seçilərək toxumları emal ediləcək, qablaşdırılıb əkin üçün fermerlərə veriləcək.
Sonda fermerləri maraqlandıran suallar cavablandırılıb.
Ağstafada Aqrar İnnovasiya Festivalı çərçivəsində toxum sərgi-satış yarmarkası təşkil olunub
Bu il Oğuzun taxıl sahələrində orta məhsuldarlıq 30,9 sentner olub
Balakənli fermerlər 7819 hektar sahədə dən üçün qarğıdalı yetişdiriblər
Bu il Beyləqanda 23 min tondan çox pambıq istehsalı gözlənilir
Qəhvəyi mərmər bağacığını aşkar etmək məqsədilə Şəkinin kəndlərində 100 feromon tələ asılıb