Bakı, 7 avqust, AZƏRTAC
Əmtəə birjalarında qızılın qiyməti yanvar ayından bəri ən güclü həftəlik artım nümayiş etdirməyə hazırlaşır.
AZƏRTAC xəbər verir ki, hazırda Nyu-Yorkun COMEX əmtəə birjasında qızılın bir troya unsiyasının qiyməti 4294 dollar civarındadır. Son 7 həftənin ən yüksək səviyyəsinə çatan qızıl həftəlik olaraq 5 faizdən çox qazanc əldə edib. Qızılın qiyməti ötən həftə ərzində isə 0,6 faiz artım göstərib, iyul ayında təxminən 1,7 faiz bahalaşıb. İyulda qızılın qiyməti son 5 ayda ilk dəfə aylıq artım tempi nümayiş etdirib.
Digər qiymətli metallar - gümüş və platinin də qiyməti bahalaşıb, palladiumun qiyməti isə ucuzlaşıb. Hər üç metalın qiyməti həftəlik artım nümayiş etdirib.
Ekspertlərin fikrincə, Yaxın Şərqdə sülhə dair ümidlərin güclənməsi inflyasiya gözləntilərini azaldıb və uzun müddət 4000 dollar səviyyəsindən yuxarıda qaldıqdan sonra qızılın güclü bir hərəkət etməsinə imkan yaradıb. Neft qiymətlərinin azalması da qızılın qiymətinin yuxarı istiqamətli dəyişməsinə təsir göstərir.
“Citigroup”un analitikləri qızılın qiymətinin növbəti ay ərzində sabit qalacağını və ya bir qədər azalacağını, ilin dördüncü rübündə 4500 dollara, gələn ilin birinci yarısında isə 5000 dollara yüksələcəyini proqnozlaşdırırlar.
“J.P. Morgan” bankının analitikləri isə hesab edirlər ki, əsas sektorlardan qızıla tələbat əvvəllər proqnozlaşdırıldığı qədər güclü olmayacaq. Bank cari ilin üçüncü rübündə qızılın qiymətinin 4300 dollar, dördüncü rübdə isə 4500 dollar olacağını proqnozlaşdırır. “J.P. Morgan” mərkəzi bankların alışlarının və fiziki tələbin 2027-ci ildə qızılın qiymətini dəstəkləməyə davam edəcəyini gözləyir.
Qızıl ənənəvi olaraq inflyasiyaya qarşı hedcinq kimi qəbul edilsə də, yüksək faiz dərəcəsi mühitində cəlbediciliyini itirir, çünki heç bir gəlir gətirmir. Dollar indeksi bir ildən çox müddət ərzində ən yüksək səviyyəsinə yüksəlib və bu da qızılı beynəlxalq alıcılar üçün daha bahalı edir.