Bakı, 5 avqust, AZƏRTAC

Azərbaycan Mərkəzi Bankı (AMB) tərəfindən maliyyə xidmətləri sahəsində vətəndaşların hüquqlarının qorunması və xidmət səviyyəsinin yüksəldilməsi məqsədilə avqustun 5-də Zəngilan rayonunda növbəti səyyar görüş təşkil edilib.
AMB-dən AZƏRTAC-a bildirilib ki, görüşdə Cəbrayıl və Zəngilan rayonlarının sakinləri iştirak edib. Səyyar görüş zamanı sakinlərin qarşılaşdıqları çətinliklər və təkliflər dinlənilib. Müraciətlər maliyyə xidmətləri, o cümlədən ATM quraşdırılması ilə əlaqəli olub.
Səsləndirilən məsələlərin bir qismi yerindəcə aidiyyəti təşkilatlara kommunikasiya edilib, araşdırma tələb edən müraciətlər isə icraya yönəldilib.
Qeyd edək ki, vətəndaşlar Mərkəzi Bankın səyyar görüşləri və xidmətləri ilə bağlı müraciətlərini www.contact.e-cbar.az saytı və ya “966” Çağrı Mərkəzi vasitəsilə çatdıra bilərlər.