Bakı, 25 iyun, AZƏRTAC

Azərbaycanın təşkilatçılığı və İslam Əməkdaşlıq Təşkilatına (İƏT) üzv dövlətlərin parlamentlərinin fəaliyyəti tədbirin uğurunda mühüm rol oynayıb.
AZƏRTAC xəbər verir ki, bu sözləri İƏT-ə üzv dövlətlərin Parlament İttifaqı Konfransının 20-ci Sessiyasında İttifaqın Baş katibi Muhammed Xurayçi Niyass deyib.
O qeyd edib ki, digər beynəlxalq tədbirlərin Azərbaycanda yüksək səviyyədə təşkil olunması səbəbindən bu konfrans da məhz Bakıda keçirilib.
“Görüşlərin keçirilməsi üçün yaradılan əlverişli şəraitə, konfransın və əlaqədar tədbirlərin uğurla başa çatmasına göstərilən diqqət və qayğıya görə minnətdarlığımızı ifadə edirik. Bu dəstək tədbirlərimizin uğurla nəticələnməsində mühüm rol oynayacaq”, - deyə Baş katib vurğulayıb.
Muhammed Xurayçi Niyass sonda Azərbaycan xalqına və Prezident İlham Əliyevə konfrans iştirakçılarına göstərilən qonaqpərvərliyə, səmimi münasibətə və yüksək ehtirama görə təşəkkürünü bildirib.