Bakı, 5 iyun, AZƏRTAC

Serb Respublikası adından Azərbaycana bu mühüm qlobal tədbirə ev sahibliyi etdiyinə, göstərdiyi qonaqpərvərliyə və liderliyə görə səmimi təşəkkürümü bildirirəm. Bu gün biz burada yalnız dövlətlərin nümayəndələri kimi deyil, həm də ortaq evimizin qoruyucuları kimi toplaşmışıq. Təbiətdən ilham alaraq, birlikdə iqlimədavamlı gələcək qurmağa sadiqliyimizi bir daha bəyan edirik.
AZƏRTAC xəbər verir ki, bunu Serbiyanın ətraf mühitin mühafizəsi naziri Sara Pavkov Bakıda keçirilən Ümumdünya Ətraf Mühit Gününə həsr olunmuş beynəlxalq tədbirdə çıxışı zamanı deyib.
"Bütün dünyada biz iqlim dəyişikliyi, biomüxtəlifliyin itirilməsi, torpaq deqradasiyası, çirklənmə və su ehtiyatları üzərində artan təzyiq kimi mürəkkəb və bir-biri ilə əlaqəli çağırışlarla üz-üzəyik. Bu problemlər sərhəd tanımır və beynəlxalq ictimaiyyətdən dayanıqlı inkişaf, həmrəylik və tərəfdaşlıq prinsiplərinə əsaslanan birgə, əlaqələndirilmiş və inklüziv yanaşma tələb edir. Məhz buna görə də bu reallıqlarla mübarizədə birlik nümayiş etdirməliyik. Bu məqsədlə təbiətin gücündən faydalanaraq innovativ, dayanıqlı, elmi əsaslara söykənən və ekosistemlərin davamlılığını nəzərə alan həllər tapmalıyıq. Təbiətin gücündən ilham almaqla çağırışları fürsətlərə çevirə bilərik. Serbiya da məhz buna görə əməkdaşlığın gücləndirilməsinə və uzunmüddətli, dayanıqlı nəticələr verə biləcək həllərin birgə müəyyənləşdirilməsinə xüsusi önəm verir. Azərbaycanı Ümumdünya Ətraf Mühit Günü 2026-nın nümunəvi təşkilinə görə ən yüksək qiymətləndirmə ilə təbrik edirik. Bu tədbir uzaqgörənliyin, fədakarlığın və kollektiv fəaliyyətin gücünün bariz nümunəsidir və gələcək ev sahibi ölkələr üçün yüksək standart müəyyən edir. Serbiya üçün bu həm böyük ilham mənbəyi, həm də Ümumdünya Ətraf Mühit Günü 2027-ni Belqradda daha böyük təsir səviyyəsinə çatdırmaq üçün məsuliyyətli bir çağırışdır. Bu gün Ümumdünya Ətraf Mühit Günü 2027-yə ev sahibliyinin rəsmi olaraq Serb Respublikasına təhvil verilməsi davamlılığın və varisliyin rəmzi olan mühüm bir məqamdır. Bu hadisə qlobal səviyyədə irəliləyiş tempini qorumaq və kollektiv fəaliyyətə ilham vermək istiqamətində ortaq məsuliyyətimizi əks etdirir", - deyə Sara Pavkov vurğulayıb.