Aprelin 18-19-da Bakıda “Mərkəzi Asiya və Qafqazın metal bazarı” adlı dördüncü beynəlxalq konfrans keçiriləcək. Konfransın məqsədi Mərkəzi Asiya və Qafqaz regionu ölkələrində metal bazarının hazırkı tendensiyalarının və perspektivlərinin, bu regionlarda qara metallurgiyaya investisiya layihələrinin, cari qiymət mühitinin, həmçinin ayrı-ayrı regionların inkişaf xüsusiyyətlərinin müzakirəsidir. Konfransda Rusiya Federasiyası, Qazaxıstan, Özbəkistan və s. kimi dövlətlərin bu sahə üzrə aparıcı şirkətləri iştirak edəcəklər.
Rusiya Federasiyasının metallurgiya sahəsində ixtisaslaşmış “Металлоснабжение и сбыт” jurnalının təşkilatçılığı ilə baş tutacaq konfransın baş tərəfdaşı və fəal iştirakçısı Qafqazın ən böyük metallurgiya şirkəti olan “Baku Steel Company” QSC-dir (BSC).
Beynəlxalq konfransda BSC-nin nümayəndələri “Azərbaycan Respublikasının metal bazarının inkişaf tendensiyaları”, “Baku Steel Company”-nin strategiyası” kimi mövzularda məruzə ilə çıxış edəcəklər.
“Mərkəzi Asiya və Qafqazın metal bazarı” konfransı çərçivəsində 19 aprel tarixində BSC-nin Sumqayıt şəhərindəki Azərboru istehsalat sahəsinə tanışlıq ekskursiyası da baş tutacaq.