Moskva, 6 aprel, AZƏRTAC

Rusiyanın Orenburq vilayətinin Orsk şəhərinin yaxınlığındakı Ural çayında su bəndinin dağılması nəticəsində subasmaya məruz qalmış ərazilərdən 3 mindən çox insan təxliyə edilib.
AZƏRTAC xəbər verir ki, Orenburq vilayəti hökumətinin mətbuat xidmətinin məlumatına görə, 2400-dən çox yaşayış binası və 3065-dən artıq həyətyanı sahə su altında qalıb, həmçinin azı 11 min ailə təsərrüfatı təhlükə altındadır. Fəlakət zonasında 11 müvəqqəti yaşayış məntəqəsi yaradılıb. Hadisə yerində xilasedicilər işləyirlər.
Çelyabinsk vilayətində də evləri və torpaq sahələrini su basması səbəbindən fövqəladə vəziyyət yaranıb. Ümumilikdə, daşqın başlayandan xilasedicilər bölgədə 234 nəfəri təxliyə ediblər.