Dövlət Məşğulluq Agentliyinin sədri: Özəl təlim müəssisələrini Şərqi Zəngəzura və Qarabağa dəvət etmişik
Şuşa, 7 mart, Tahir Ağaməmmədov, AZƏRTAC
“Böyük Qayıdışa dair I Dövlət Proqramı”nda əhalinin köçürülməsi və məşğulluq məsələsinin təmin olunması ən əsas prioritetlər kimi müəyyən edilib. Bu çərçivədə ən vacib məsələlərdən biri köçən əhalinin peşələrinin müəyyən olunması və onların əmək bazarına uyğunlaşmasının təmin edilməsidir.
Bunu AZƏRTAC-ın bölgə müxbirinə açıqlamasında Şuşada “Əhalinin peşə hazırlığının təşkili” mövzusunda keçirilən tədbirdə iştirak edən Dövlət Məşğulluq Agentliyinin İdarə Heyətinin sədri Mustafa Abbasbəyli deyib.
“Vacib məsələlərdən biri peşə hazırlığıdır və agentliyin tabeliyində olan dörd peşə hazırlığı mərkəzi vasitəsilə bu proqramı həyata keçirməyə çalışırıq. Eyni zamanda, 2021-ci ildən başlanılan dövlət-özəl tərəfdaşlıq modeli çərçivəsində özəl təlim müəssisələri ilə daimi sifarişlər həyata keçiririk. Bugünkü tədbirdə biz o müəssisələri Şərqi Zəngəzur və Qarabağ ərazisinə dəvət etdik. Onların fəaliyyətinə dəstək göstərilməsini müzakirə etdik”, – deyə İdarə Heyətinin sədri bildirib.
Mustafa Abbasbəyli işğaldan azad olunmuş ərazilərdə kənd təsərrüfatı, tikinti, emal sənayesi, ictimai iaşə, turizm sahələri, eləcə də alternativ enerji üzrə mütəxəssislərə daha çox ehtiyac olacağını qeyd edib.
Şəkidə ümumi orta təhsil səviyyəsi üzrə kolleclərə qəbul imtahanları iki mərkəzdə aparılıb
Gəncədəki Rus Pravoslav Kilsəsində Pasxa bayramı qeyd olunub
Azərbaycanın şimal bölgəsindəki pravoslavlar Pasxa bayramını qeyd edirlər VİDEO
“Təhsildə yeni çağırışlar” - növbəti regional konfrans Xaçmazda təşkil olunub