Tbilisidə “Xocalı uşaqların gözü ilə” adlı sərgi təşkil olunub
Tbilisi, 25 fevral, AZƏRTAC
Fevralın 25-də Tbilisidəki M.F.Axundzadə adına Azərbaycan Mədəniyyəti Mərkəzinin qalereyasında “Xocalı uşaqların gözü ilə” adlı rəsm sərgisi açılıb.
AZƏRTAC xəbər verir ki, sərgi Azərbaycanın Gürcüstandakı səfirliyinin və M.F.Axundzadə adına Azərbaycan Mədəniyyəti Mərkəzinin birgə təşkilatçılığı ilə reallaşıb.
Qeyd edək ki, Azərbaycan səfirliyinin təşəbbüsü ilə Gürcüstanın Azərbaycandilli məktəblərinin şagirdləri arasında Xocalı soyqırımının 31-ci ildönümünə həsr olunmuş rəsm müsabiqəsi keçirilib. Sərgidə müsabiqədə iştirak edən şagirdlərin əl işləri nümayiş etdirilib.
Səfir Faiq Quliyev açılış mərasimində bildirib ki, müsabiqədə paytaxt Tbilisi ilə yanaşı Marneuli, Qardabani, Bolnisi və Dmanisi rayonlarının məktəblərinin şagirdləri iştirak ediblər. Məqsəd Xocalı soyqırımına uşaqların gözü ilə baxmaq, onların düşüncələrini öyrənməkdir. Sərgidə nümayiş etdirilən 100-ə yaxın əl işinə baxdıqda uşaqların da Xocalı faciəsini ürəkağrısı ilə yaşadıqları aydın görünür.
Səfir onlara yaradıcılıqda və təhsildə uğurlar, xoşbəxt gələcək arzulayıb.
Tanınmış rəssam, münsiflər heyətinin üzvü Əli İsayev çıxışında uşaqların yaradıcılıq potensialından danışıb, onların əməyini yüksək qiymətləndirib.
Marneuli rayonunun Böyük Muğanlı kənd məktəbinin direktoru Musa Yusifli müsabiqənin və sərginin təşkilinə görə səfirliyə və muzey rəhbərliyinə təşəkkür edib. Onun sözlərinə görə, bu cür tədbirlər uşaqlarda vətənpərvərlik hissinin artırılmasında, tariximizi öyrənməkdə mühüm rol oynayır.
Muzeyin direktoru, Azərbaycanın Əməkdar mədəniyyət işçisi Leyla Əliyeva da uşaqları təbrik edib, onlara yaradıcılıq uğurları arzulayıb.
Böyük Muğanlı kənd məktəbinin 8-ci sinif şagirdi Zümrüd Quliyeva Xocalıya həsr etdiyi şeiri söyləyib.
Sonra sərginin açılışı olub və sərgidə iştirak edən uşaqlara sertifikatlar təqdim edilib.
Xətayi Əzizov
AZƏRTAC-ın xüsusi müxbiri
Tbilisi
Xocalı soyqırımı şahidinin xatirələri holland dilində dərc olunub
Xocalı soyqırımının 32-ci ildönümü ilə bağlı ümumukrayna onlayn konfransı keçirilib
Dmitri Savelyev: Xocalı hadisələrinə soyqırımından başqa ad vermək çətindir
Xocalı faciəsi ilə əlaqədar Sloveniyanın paytaxtında maarifləndirmə aksiyası keçirilib
Parisdə “İşgəncələr məbədi - Şuşa həbsxanası” sənədli filmi nümayiş olunub VİDEO