Bakı, 12 yanvar, AZƏRTAC

Azərbaycan Basketbol Liqasında XIII turun daha bir oyunu keçirilib.
AZƏRTAC xəbər verir ki, ikinci oyun günündə "Gəncə" və NTD komandaları üz-üzə gəliblər. Gərgin keçən görüşün sonunda NTD basketbolçuları 86:79 hesablı qələbə qazanıblar. Komanda birgünlük fasilədən sonra yenidən turnir cədvəlinin ilk pilləsinə yüksəlib.
Ən məhsuldar basketbolçular "Gəncə"dən Ceylon Perri (28 xal, 2 ribaund), NTD-dən isə Kuinton Kempbel (23 xal, 5 ribaund) olublar.
Qeyd edək ki, turun "Neftçi İK"-"Zirvə Astara" və "Olimpik Şəki"-"AAAF Xırdalan" matçları yanvarın 14-də və 15-də oynanılacaq.