Bərdə-Ağdam və Horadiz-Ağbənd dəmir yolu layihəsinin gələn ilin sonuna kimi yekunlaşması nəzərdə tutulub
Bakı, 19 oktyabr, AZƏRTAC
Bərdə-Ağdam dəmir yolu xəttində layihələndirmə və tikinti işlərinə Prezident İlham Əliyevin 2020-ci il 24 noyabr tarixli Sərəncamına əsasən başlanılıb. Ox üzrə uzunluğu 47,1 kilometr olan bu dəmir yolu tək xətlidir və tikinti-quraşdırma işləri iki mərhələdə həyata keçirilir.
AZƏRTAC xəbər verir ki, bu barədə “Azərbaycan Dəmir Yolları” QSC-nin mətbuat katibi Natəvan Bayramova “Rebuild Karabakh” - II Azərbaycan Beynəlxalq “Qarabağın Bərpa, Yenidənqurma və İnkişafı” sərgisində deyib.
O bildirib ki, layihə çərçivəsində ümumilikdə 133 süni mühəndis qurğusunun, 4 stansiyanın (Bərdə, Köçərli, Təzəkənd və Ağdam) və 34 yoldəyişən qurğunun tikintisi planlaşdırılır. Hazırda tikinti üzrə tərəqqi 58 faiz təşkil edir.
“Təməli Prezident İlham Əliyev tərəfindən 2021-ci il fevralın 14-də qoyulmuş, ox üzrə uzunluğu 110,4 kilometr təşkil edən Horadiz-Ağbənd dəmir yolu xəttində tikinti-quraşdırma işləri üç mərhələdə həyata keçirilir. Dəmir yolu xəttinin trassası 9 stansiyadan (Horadiz, Mərcanlı, Mahmudlu, Soltanlı, Qumlaq, Həkəri, Mincivan, Bartaz, Ağbənd) ibarət olacaq. Layihə çərçivəsində ümumilikdə 453 süni mühəndis qurğusunun, o cümlədən və 70 yoldəyişən qurğunun tikintisi planlaşdırılır. Hazırda 62-71 kilometr aralığında torpaq işləri və süni qurğuların tikintisi işləri davam edir.
Hər iki layihənin 2023-cü ilin sonuna kimi tamamlanması nəzərdə tutulur”, - deyə N.Bayramova vurğulayıb.
AYNA taksi sürücüləri üçün təlimlərə başlayıb
Daha bir küçədə sürət həddi endirilib
“AzParking” mobil tətbiq istifadəçilərinin sayı artıb
ASCO üzrə bu ilin II rübündə təhvil verilən müxtəlif tullantıların həcmi açıqlanıb