Bakı, 5 sentyabr, AZƏRTAC

Azərbaycan Kanoe və Avarçəkmə Federasiyasının (AKAF) rəhbəri Vüqar Əhmədov Beynəlxalq Avarçəkmə Federasiyasının (FISA) prezidenti Jan Kristof Rollandla görüşüb.
AKAF-dan AZƏRTAC-a bildiriblər ki, FISA-nın İsveçrənin Lozanna şəhərində yerləşən mənzil-qərargahında baş tutan görüşdə ölkəmizdə avarçəkmənin tarixi, inkişaf mərhələsi, bu günü və gələcək planları haqqında məlumat verilib.
Qeyd olunub ki, hələ ötən əsrin ortalarında ümummilli lider Heydər Əliyevin ilk hakimiyyəti dönəmində Azərbaycanda 11 müstəqil avarçəkmə klubu fəaliyyət göstərib. O vaxtlar təşkil edilmiş “Mingəçevir Reqatası”nda nəinki Sovetlər Birliyi, eləcə də Avropanın bir çox ölkələrinin idmançıları iştirak ediblər. 1964-cü ildə istifadəyə verilən “Kür” Olimpiya Tədris-İdman Mərkəzində keçmiş SSRİ ölkələri ilə yanaşı, əvvəlki Yuqoslaviya, Bolqarıstan, hətta Kuba komandaları da təlim-məşq keçiblər.
AKAF-ın rəhbəri Vüqar Əhmədov bildirib ki, dövlət başçısı, Milli Olimpiya Komitəsinin Prezidenti İlham Əliyev idmana və idmançılara böyük diqqət ayırır. Ölkə başçısı İlham Əliyevin müvafiq tapşırığı əsasında “Kür” Olimpiya Tədris-İdman Mərkəzi 2010-cu ildə əsaslı təmir edilib. Hazırda bütün beynəlxalq standartlara tam cavab verən “Kür” Olimpiya Tədris-İdman Mərkəzində “Bakı-2015” birinci Avropa Oyunlarının avarçəkmə yarışları yüksək səviyyədə təşkil olunub.
Görüş zamanı Azərbaycan idmançılarının beynəlxalq yarışlar – Avropa və dünya çempionatları, həmçinin Olimpiya Oyunlarında çoxsaylı mükafatlar qazanması FISA prezidentinin diqqətinə çatdırılıb. Cari ilin mayında Suqovuşan su anbarında və Mingəçevir şəhərində təşkil olunan kayak-kanoe və akademik avarçəkmə üzrə “Prezident kuboku” beynəlxalq reqatası ilə bağlı videoçarx Jan Kristof Rollanda nümayiş etdirilib.
Qeyd olunub ki, Azərbaycanda avarçəkmə idman növünü daha da inkişaf etdirmək üçün yeni su hövzələrinə baxış keçirilir və müvafiq infrastrukturun yaradılması üçün işlər görülür.
Görüşdə qarşılıqlı əlaqələrin gələcək inkişafı, beynəlxalq federasiya prezidentinin ölkəmizə səfərinin təşkili müzakirə olunub. Qarşıdakı illərdə sahil avarçəkməsi üzrə dünya və ya Avropa çempionatının Azərbaycanda təşkil olunması ilə bağlı fikir mübadiləsi aparılaraq bu istiqamətdə işlərin davam etdirilməsi ilə bağlı razılıq əldə edilib.
Sonda Jan Kristof Rolland görülən işləri yüksək qiymətləndirib. Beynəlxalq federasiyanın rəhbəri Jan Kristof Rolland AKAF-a hər zaman dəstək verməyə hazır olduqlarını deyərək federasiyaya gələcək fəaliyyətində uğurlar arzulayıb.