Bakı, 23 iyun, AZƏRTAC

Ümummilli lider Heydər Əliyevin anadan olmasının 99-cu ildönümü münasibətilə Təhsil Nazirliyi və Azərbaycan Təhsil İşçiləri Azad Həmkarlar İttifaqı Respublika Komitəsinin (ATİAHİ RK) ali təhsil müəssisələrinin tələbələri arasında təşkil etdiyi bədii yaradıcılıq müsabiqə-festivalının qaliblərinin mükafatlandırılma mərasimi keçirilib.
Bu barədə AZƏRTAC-a Azərbaycan Dövlət Pedaqoji Universitetindən (ADPU) məlumat verilib. Bildirilib ki, universitetin 6 tələbəsi müsabiqə-festivalda müxtəlif nominasiyalarda yer tutub. Vokal ifası nominasiyasında Riyaziyyat fakültəsinin II kurs tələbəsi Dilarə Abdullayeva 1-ci, aşıq musiqisi nominasiyasında “SABAH” qruplarının III kurs tələbəsi Nəzrin Məlikova 1-ci, şeir nominasiyasında Filologiya fakültəsinin I kurs tələbəsi Aytac Muradlı 3-cü, muğam ifası nominasiyasında Filologiya fakültəsinin II kurs tələbəsi Ülkər Paşayeva 3-cü, musiqi alətində ifa nominasiyasında İncəsənət və fiziki tərbiyə fakültəsinin I kurs tələbəsi Arif Səmədzadə 3-cü, habelə ADPU-nun xor kollektivi 3-cü yerə layiq görülüb.
Qaliblər diplom və qiymətli hədiyyələrlə mükafatlandırılıb.
Qeyd edək ki, Pedaqoji Universitetin tələbələri müsabiqədə qazandıqları göstəricilərlə digər ali təhsil müəssisələrini üstələyərək ümumi hesabda da birinci yerdədir.