Bakı, 22 sentyabr, AZƏRTAC

“Azərbaycan Hava Yolları” QSC-nin (AZAL) Pilotların Hazırlığı Mərkəzində “Embraer E-190” tipli təyyarələrində uçuşların simulyasiyası üçün yeni təlim trenajor kompleksi quraşdırılıb.
AZAL-dan AZƏRTAC-a bildirilib ki, yeni trenajor kompleksi Azərbaycan Milli Aviadaşıyıcısının pilotlarına xaricə getmədən ölkəmizdə hazırlıq keçmələrinə imkan verəcək.
Milli Aviasiya Akademiyasında (MAA) trenajor kompleksinin quraşdırılması məqsədilə beynəlxalq pilotların hazırlığı mərkəzləri üçün irəli sürülən ən son tələblərə uyğun olaraq Trenajor kompleksinin yeni binası inşa edilib.
Trenajor kompleksinin istehsalçısı Amerikanın məşhur “FlightSafety International” şirkətidir.
Həmin trenajorun alınmasına dair müqavilə 2019-cu il dekabrın 16-da Bakı şəhərində Azərbaycan tərəfindən AZAL-ın prezidenti Cahangir Əsgərov və Milli Aviasiya Akademiyasının rektoru, akademik Arif Paşayev ilə “FlightSafety International” şirkəti tərəfindən aviatrenajorlara xidmət üzrə icraçı direktor Con Van Maren və satış üzrə direktor Filip Delfur arasında imzalanıb.
“FS1000 Embraer E190-E1 Level D Full Flight Simulator” tipli yeni trenajor kompleksi MAA-da quraşdırıldıqdan sonra Avropa Aviasiya Təhlükəsizliyi Agentliyi (EASA) tərəfindən uğurla sertifikatlaşdırılaraq trenajorlar üçün ən yüksək “D” səviyyəsinə uyğun olduğunu təsdiqləyib.
Sertifikatlaşdırma prosesi zamanı EASA tərəfindən 170-dən çox keyfiyyət və uçuş proseduru üzrə testlərdən keçirilib. Trenajorun bütün sistemlərinin real hava gəmisi ilə uyğunluğu yoxlanılıb.
Həmin kompleksdə təkcə Azərbaycan pilotları deyil, xarici aviaşirkətlərin pilotları da təlim keçəcəklər.
“EMB190-100” tipli trenajor vasitəsilə uçuş zamanı təyyarənin kabinəsi, uçuş dinamikası və ətrafın görünmə dərəcəsi real həyatda olduğu kimi əks olunur. Bu, pilotlara təlimi uğurla başa vurduqdan sonra yeni tip hava gəmiləri üçün lisenziya almağa və ya yenidən hazırlıq keçməyə imkan verir.
AZAL-ın Pilotların Hazırlıq Mərkəzi 2010-cu ildən fəaliyyət göstərir. Nəzəri və təcrübi hazırlıq şöbələrindən ibarətdir. Nəzəri təlim şöbəsi hər il 300-dən çox ixtisasartırma kursunda 7000-dən çox mülki aviasiya mütəxəssisinin iştirakını təmin edir. Təcrübi təlim şöbəsində peşəkar təyyarəni idarəetmə bacarıqlarının əldə edilməsi və saxlanılması üçün çox vacib olan “Airbus A319/320”, “Boeing 757/767”, “ATR-42/72”, eləcə də “Mi-8AMT” helikopteri üçün uçuş trenajorları fəaliyyət göstərir.