Bakı, 30 oktyabr, AZƏRTAC

“Ferrari” komandasında sonuncu mövsümünü keçirən Sebastyan Fettel növbəti ildən “Aston Martin”in bolidini idarə edəcək. Hazırda “Reysinq Point” adı altında mübarizə aparan bu komandaya S.Fettelin cəlb olunmasında Formula 1 ictimaiyyətinin bilmədiyi nüanslar da var.
AZƏRTAC xəbər verir ki, Formula 1-in sabiq rəhbəri Berni Ekklstoun S.Fettelin “Aston Martin”ə keçidində böyük rol oynadığını etiraf edib. Mətbuata açıqlama verən 90 yaşlı funksioner “Reysinq Point”in sahibi Lorens Stroulu razı saldığını söyləyib: “Mən Fetteli komandasına götürməsi üçün Lourens Strolla təzyiq göstərdim. Onun yaxşı pilot olduğunu və bu keçiddən “Aston Martin”in qazanacağını iddia etdim. Fikrimcə, gətirdiyim dəlillər onun ağlına batdı. Ümumiyyətlə, biz Sebastyanla müntəzəm olaraq zəngləşirik. Onun fikirlərini dinləyir və öz məsləhətlərimi verirəm. Hazırda heç kim Fettel haqda xoş fikirlər səsləndirmir. Unutmaq lazım deyil ki, Formula 1-də hər şey idarə etdiyin boliddən asılıdır. İndiki məqamda “Ferrari” Sebastyana uyğun komanda deyil”.
Xatırladaq ki, mövsümün sonunda Fettelin “Ferrari” ilə müqavilə müddəti başa çatacaq. Almaniyalı pilot bu komandada heç bir titul qazanmasa da, “Red Bull”la ardıcıl 4 mövsüm dünya çempionu olmağı bacarmışdı. O, növbəti mövsüm “Aston Martin”də çıxış edəcək.