Bakı, 19 fevral, AZƏRTAC

Azərbaycan Milli Elmlər Akademiyasının Mərkəzi Elmi Kitabxanasındakı (MEK) bütün lüğətlər ümumi fondun tərkibindən ayrılaraq SL formatı altında xüsusi fondda yerləşdirilib.
MEK-dən AZƏRTAC-a bildirilib ki, bu, həm qiymətli fondun mühafizəsini asanlaşdırır, həm də oxucu sorğularının operativ və yüksək səviyyədə ödənilməsinə şərait yaradır. MEK-in çox zəngin Lüğətlər fondu var. Hətta elə kitablar var ki, onlar respublikada ancaq burada yerləşir. Həm nəşr tarixinə, həm də elmi-tarixi əhəmiyyətinə görə bir çox nadir nüsxələr fondun dəyərini daha da artırır. “Kilsə-slavyan və rus dili lüğəti”, “Bütöv fransız-rus dili lüğəti”, “Alman-rus dili lüğəti”, “Rus-İsveç dili lüğəti”, “İngilis-rus neft terminləri lüğəti”, “Azərbaycan-rus dili lüğəti”, “Xarici sözlər lüğəti”, “Rusca köksözlər lüğəti”, “Rus-türk dili lüğəti” və bir çox qiymətli nəşrlər fondda mühafizə olunur. Hazırda 2495 nüsxədən ibarət fondun elektron kataloqa salınması prosesi gedir.