Bakı, 22 oktyabr, AZƏRTAC

Kiçik və Orta Biznesin İnkişafı Agentliyinin (KOBİA) dəstəyi ilə inşaat sektorunda fəaliyyət göstərən KOB-lar oktyabrın 22-də Bakı Sərgi Mərkəzində açılan XXV Azərbaycan Beynəlxalq İnşaat (“BakuBuild” 2019) sərgisində iştirak edirlər.
KOBİA-dan AZƏRTAC-a bildirilib ki, sərgidə KOB-lar üçün ayrılmış xüsusi stenddə müxtəlif inşaat materialları, mühəndislik xidmətləri, istilik sistemləri, avtomatlaşdırılmış qapılar, “ağıllı ev”, təhlükəsizlik sistemləri, landşaft memarlığı və sair məhsul və xidmətlər nümayiş olunur. KOBİA, həmçinin “BakuBuild 2019” sərgisinə dəstək göstərən qurumlar sırasındadır.
“BakuBuild 2019” sərgisi ilə eyni platformada Xəzər Beynəlxalq Mebel, İnteryer və Dizayn Sərgisi (“Caspian MebelExpo 2019”), XII Xəzər Beynəlxalq Mühafizə, Təhlükəsizlik və Xilasetmə Vasitələri Sərgisi (“Securex Caspian 2019”) və XII Beynəlxalq “İstilik, Havalandırma, Kondisionerləşdirmə, Su təchizatı, Santexnika və Üzgüçülük Hovuzu Sərgisi “Aquatherm Baku 2019” keçirilir. Sərgilər oktyabrın 25-dək davam edəcək.