Qəbələdə Xocalı faciəsinə həsr olunan rəsm müsabiqəsinə yekun vurulub
Qəbələ, 22 fevral, Mustafa Dadaşov, AZƏRTAC
Qəbələdə Xocalı faciəsinin 27-ci ildönümünə həsr olunan “Xocalı faciəsi uşaqların gözü ilə” mövzusunda rəsm müsabiqəsinə yekun vurulub. Rayon Gənclər və İdman İdarəsinin təşkilatçılığı, Mədəniyyət Mərkəzi, Qəbələ Dövlət Rəsm Qalereyası və Uşaq İncəsənət Məktəbinin dəstəyi ilə keçirilən müsabiqənin yekun sərgisində 40-dək yeniyetmə və gənc rəssamın 100-ədək əsəri nümayiş etdirilib.
AZƏRTAC-ın bölgə müxbiri xəbər verir ki, tədbirdə rayon Gənclər və İdman İdarəsinin rəisi Fəxri Soltanov, İncəsənət Məktəbinin direktoru Əhməd Qəndiyev, Mədəniyyət Mərkəzinin metodisti Anar Rüstəmli və başqaları çıxış edərək, Xocalı faciəsinin təkcə Azərbaycan xalqına qarşı deyil, bütövlükdə bəşəriyyətə qarşı törədilmiş dəhşətli cinayət, soyqırımı olduğunu bildiriblər. Qeyd olunub ki, Xocalı soyqırımının törədilməsində əsas məqsəd Dağlıq Qarabağı və Azərbaycanın digər torpaqlarını ələ keçirmək, xalqımızın müstəqillik uğrunda mübarizə əzmini qırmaq idi.
Bildirilib ki, müsabiqənin keçirilməsində əsas məqsəd Xocalı faciəsinin acı nəticələrini bir daha uşaq, yeniyetmə və gənclərin diqqətinə çatdırmaq, eyni zamanda, onların bədii yaradıcılıq potensialını üzə çıxarmaq, inkişaf etdirməkdir.
Sonra tədbir iştirakçıları müsabiqəyə təqdim olunan rəsm əsərləri ilə tanış olublar. Münsiflər heyətinin rəyinə əsasən, Ruhəngiz Babayeva müsabiqənin qalibi adını qazanıb. Ləman Əliyeva və Zərifə Rəcəbova ikinci, Aytən Qədirova, Fidan Həşimli və Banuçiçək Şəfiyeva üçüncü yeri tutublar.
Müsabiqənin qalibləri diplom və xatirə hədiyyələri ilə, digər iştirakçılar isə fəxri fərmanlarla mükafatlandırılıblar.
Xocalı soyqırımı şahidinin xatirələri holland dilində dərc olunub
Xocalı soyqırımının 32-ci ildönümü ilə bağlı ümumukrayna onlayn konfransı keçirilib
Dmitri Savelyev: Xocalı hadisələrinə soyqırımından başqa ad vermək çətindir
Xocalı faciəsi ilə əlaqədar Sloveniyanın paytaxtında maarifləndirmə aksiyası keçirilib
Parisdə “İşgəncələr məbədi - Şuşa həbsxanası” sənədli filmi nümayiş olunub VİDEO