Bakı, 23 avqust, AZƏRTAC

Qlobal smartfon bazarının həcmi 6,7 faiz yüksəlib. Bu, orta səviyyəli modellərə artan tələbatla izah edilir.
AZƏRTAC xəbər verir ki, bu haqda “Gartner” analitik şirkətinin yeni hesabatında deyilir.
Ekspertlərin qiymətləndirməsinə görə, 2017-ci ilin ikinci rübündə istehlakçılar 366,2 milyon smartfon satın alıblar. Ötən il bu göstərici 343,4 milyon idi. “Android” sistemli qurğuların payı 87,7 faizədək artıb, “iOS” ilə işləyən qurğularda bu göstərici 12,1 faiz təşkil edib.
"Ucuz smartfonlara tələbat güclü olaraq qalmasına baxmayaraq, inkişaf etməkdə olan bazarlarda yaxşılaşdırılmış prosessorlar, qabaqcıl kameralar və böyük yaddaş tutumuna malik “4G” aparatların satışları artmaqdadır. Bu, orta səviyyəli (150-200 dollar) smartfonlara tələbatın artmasından xəbər verir", – deyə “Gartner”in araşdırmalar üzrə direktoru Anşul Qupta deyib.
Onun sözlərinə görə, 2017-ci ilin ikinci rübündə fləş yaddaş və “OLED” ekranların defisiti bahalı smartfonların tədarük həcminə təsir göstərəcək. Məsələn, daşıyıcı çatışmazlığı artıq özünü “Huawei P10” qurğusunun satışlarında göstərib.
“Samsung Electronics” ən böyük smartfon satıcısı adını qoruyub saxlayır, onun bazar payı 22,5 faiz təşkil edib.
Koreya Respublikası nəhəngi “Galaxy Note 7” qurğusu ilə bağlı problem yaşadı, ancaq “Galaxy S8” və “S8+” smartfonlarının təqdim edilməsi “Samsung” məhsuluna yüksək tələbatı geri qaytarıb.
Bu ilin ikinci rübündə “iPhone” smartfonlarının satış həcmi illik hesablama üzrə 0,2 faiz azalıb. Buna görə “Apple”ın bazar payı 12,1 faizədək azalıb.