İstanbul, 6 avqust, AZƏRTAC

Türkiyənin Antalya vilayətində yerləşən Aspendos Antik şəhərində aparılan arxeoloji qazıntılar zamanı sağlamlıq tanrısı Asklepios və oğlu Telesforu birlikdə təsvir edən, hündürlüyü 2,20 metr olan mərmər heykəl qrupu aşkarlanıb.
AZƏRTAC xəbər verir ki, Türkiyədə həyata keçirilən “Gələcəyə Miras” layihəsi çərçivəsində üzə çıxarılan və Roma İmperatorluğu dövrünə aid edilən heykəl qrupu Teatr küçəsində, Şərq meydanındakı Monumental Qapının şimal qanadının qalıqları arasında tapılıb. Eramızın II əsrinin son rübünə aid edilən əsər bədii xüsusiyyətləri və ikonoqrafik quruluşu ilə diqqət çəkir.
Bununla bağlı açıqlama verən Türkiyənin mədəniyyət və turizm naziri Mehmet Nuri Ersoy bildirib ki, tapıntı Aspendosda sağlamlıq kultları, dini inanclar və şəhər həyatı ilə bağlı mühüm elmi məlumatlar təqdim edir.
Arxeoloqların fikrincə, Asklepios müalicə və sağlamlığın qorunmasını, Telesfor isə sağalma və reabilitasiya mərhələsini simvolizə edir. Hər iki fiqurun eyni kompozisiyada təsvir olunması antik dövrdə şəfa anlayışının bütöv şəkildə ifadə edildiyini göstərir.