İstanbul, 6 iyun, AZƏRTAC

Türkiyənin İstanbul şəhərində keçirilən “Sıfır Tullantı Forumu 2026” çərçivəsində “Məhsul yığımından sonrakı itkilərin azaldılması – qida təchizat zəncirində səmərəliliyin artırılması” mövzusunda Yüksək Səviyyəli Kənd Təsərrüfatı Nazirlər Toplantısı keçirilib.
AZƏRTAC xəbər verir ki, tədbirdə ölkəmizi kənd təsərrüfatı naziri Məcnun Məmmədov təmsil edib.
Türkiyənin kənd təsərrüfatı və meşəçilik naziri İbrahim Yumaklı toplantıda çıxış edərək bildirib ki, müasir çağırışlar və əhalinin sürətlə artımı fonunda ərzaq təhlükəsizliyinin təmin olunması mühüm əhəmiyyət kəsb edir. O qeyd edib ki, qlobal miqyasda istehsal olunan qidanın 13 faizi məhsul yığımından sonrakı mərhələlərdə itirilir. Bundan başqa, qidanın 19 faizi ev, market, restoran və ictimai iaşə məkanlarında israf olunur. Nəticədə istehsal olunan qidanın üçdəbiri süfrələrə çatmadan məhv olur. Aparılan hesablamalara görə, qida itkisi və israfının qlobal iqtisadiyyata vurduğu illik zərər 1 trilyon ABŞ dolları təşkil edir: “Ərzaq təhlükəsizliyini gücləndirmək üçün daha çox məhsul istehsal etmək kifayət deyil. Biz mövcud istehsalı qorumalı, onu uyğun şəraitdə saxlamalı, təhlükəsiz şəkildə daşınmasını təmin etməli və səmərəli şəkildə bazarlara, nəticə etibarilə isə istehlakçılara çatdırmalıyıq. Məhsul yığımından sonra itirilən hər bir məhsul süfrəyə çata biləcək qidanın yox olması, su, torpaq və enerji kimi təbii resursların itirilməsi deməkdir”.
Azərbaycanın kənd təsərrüfatı naziri Məcnun Məmmədov isə çıxışında qlobal ərzaq təhlükəsizliyi, resurslardan səmərəli istifadə və aqrar sahənin dayanıqlı inkişafının təmin olunması məsələlərinə toxunub. Nazir vurğulayıb ki, məhsul yığımından sonrakı itkilərin azaldılması əsas prioritetlərdən olmalıdır. Bu baxımdan aqro-logistika mərkəzləri, saxlama infrastrukturu, nəqliyyat şəbəkələri və rəqəmsal texnologiyalara investisiyaların artırılması vacibdir. Süni intellekt, ağıllı monitorinq sistemləri, dəqiq kənd təsərrüfatı texnologiyaları və məlumat analitikası məhsulların real vaxt rejimində izlənilməsinə, təchizat zəncirinin səmərəliliyinin yüksəldilməsinə və itkilərin azaldılmasına imkan yaradır.
Məcnun Məmmədov əlavə edib ki, Azərbaycan kənd təsərrüfatı dəyər zənciri boyunca ərzaq itkilərinin azaldılması istiqamətində kompleks tədbirlər həyata keçirir. Aqrar sahəyə investisiyaların ərzaq və məhsul itkilərinin azaldılmasına, kənd təsərrüfatı dəyər zəncirinin gücləndirilməsinə, bazarlara çıxış imkanlarının yaxşılaşdırılmasına və ölkənin ərzaq təhlükəsizliyinin möhkəmləndirilməsinə töhfə verəcəyi gözlənilir.
Nazirlər Toplantısından sonra “Kənd təsərrüfatında tədqiqat və innovasiyanın, soyuq zəncir və ağıllı logistika tətbiqlərinin məhsul yığımından sonrakı itkilərin azaldılmasında rolu” və “Kənd təsərrüfatı və ərzaq ticarətində normativ uyğunlaşdırma, texniki maneələr və yeni nəsil ticarət siyasətləri” mövzularında panel sessiyalar keçirilib.
Panel müzakirələr sual-cavab formatında davam etdirilib, mütəxəssislər qlobal iqlim dəyişikliyi fonunda kənd təsərrüfatının inklüziv və dayanıqlı inkişafının təmin olunması, təbii resurslardan səmərəli istifadə, aqrar sahədə istehsalın artırılması, nəqliyyat infrastrukturunun təkmilləşdirilməsi, məhsul itkilərinin azaldılması, ərzaq təhlükəsizliyinin təmin olunması, bu istiqamətdə beynəlxalq əməkdaşlığın gücləndirilməsi ilə bağlı fikirlərini bölüşüblər.
Bundan əlavə, forum çərçivəsində Heydər Əliyev Fondu və Nizami Gəncəvi Beynəlxalq Mərkəzinin pavilyonları açılıb.
Qeyd edək ki, Türkiyənin birinci xanımı Əminə Ərdoğanın himayəsi ilə COP31-dən əvvəl yol xəritəsinin yaradılmasına töhfə vermək məqsədi daşıyan tədbir “Antalyaya doğru: iqlim fəaliyyəti kimi sıfır tullantı” mövzusunda təşkil edilib.
Dünyanın ən böyük Sıfır Tullantı Forumu statusuna malik tədbirə 183 ölkədən 100-dən çox nazir və 200-dən çox bələdiyyə sədri daxil olmaqla, 5000-dən artıq iştirakçının qatılması hədəflənir.
Tədbir davam edir.