Bakı, 17 aprel, AZƏRTAC

Azərbaycan Qida Təhlükəsizliyi Agentliyi (AQTA) tərəfindən həyata keçirilən “Şəkəri azalt, ömrünü uzat” kampaniyası davam etdirilir.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, həmin çərçivədə iri ticarət mərkəzlərində və supermarketlərdə stendlər qurulub. Stendləri ziyarət edən şəxslərə “Qida Təhlükəsizliyi Könüllüləri” təşəbbüs qrupunun üzvü olan könüllülər kampaniya ilə bağlı ətraflı məlumat verir. Qeyd edilir ki, kampaniya əhali arasında sağlam həyat tərzinin təbliğ olunması və vətəndaşların sağlam qidalanmaya, o cümlədən şəkərin normaya uyğun qaydada istehlak edilməsinə təşviq olunması məqsədilə həyata keçirilir. Şəkərdən normadan artıq istifadə edilməsi insan orqanizmində ürək-damar xəstəlikləri, ll tip diabet, piylənmə, diş çürüməsi, uşaqlarda diqqət zəifliyi və allergik reaksiyaların yaranması, yeniyetmələrdə qavrama qabiliyyətinin aşağı düşməsi, immun sistemin zəifləməsi və xərçəng xəstəliyinin bəzi növlərinin yaranma ehtimalını artırması kimi problemlər yarada bilər. Ölkəmizdə adambaşına düşən illik şəkər istehlakı 1995-ci ildən 2023-cü ilə qədər olan müddətdə 125 faiz artıb. 2022-ci ildə bir nəfərin orta hesabla 27 kiloqram şəkər istehlak etdiyi müəyyən olunub və bu, gün ərzində təxminən 74 qram şəkərdən istifadə deməkdir. Qeyd edilən göstərici isə Ümumdünya Səhiyyə Təşkilatı tərəfindən tövsiyə olunan 25 qramdan (6 çay qaşığı) üç dəfə çoxdur. Bundan əlavə, 2012-ci ildən 2023-cü ilə qədər olan müddətdə əhalinin kakao, şokolad və şəkərli qənnadı məmulatları, eləcə də şirinləşdirilmiş mineral və qazlı su istehlakında 40 faiz artım müşahidə olunub. Həmin tendensiyanın arzuedilən olmadığı və sağlam gələcək üçün qida rasionunda şəkər istehlakının azaldılmasının, o cümlədən şəkər əlavə edilmiş məhsulların normadan artıq istehlak olunmamasının vacibliyi önə çəkilir. Stendləri ziyarət edən şəxslər arasında könüllülər tərəfindən gündəlik şəkər istehlakının nisbi ölçülməsi məqsədilə sorğu aparılır və iştirakçılara müxtəlif simvolik hədiyyələr təqdim olunur.
Qeyd edək ki, “Şəkəri azalt, ömrünü uzat” kampaniyası çərçivəsində Bakı Dövlət Universitetində, Azərbaycan Texniki Universitetində, Azərbaycan Dövlət Neft və Sənaye Universitetində, Azərbaycan Kooperasiya Universitetində, həmçinin bir sıra ümumi və məktəbəqədər təhsil müəssisələrində görüşlər təşkil olunub. Tədbirlərdə AQTA-nın və Azərbaycan Qida Təhlükəsizliyi İnstitutunun mütəxəssisləri tərəfindən “Şəkərin zərərləri”, “Şəkər əvəzediciləri” və “Gündəlik qida rasionunda meyvə-tərəvəzin əhəmiyyəti” mövzularında təqdimatlar edilib.
Həmçinin ötən müddətdə kampaniyaya bir sıra qurumlar və tanınmış şəxslər qoşulub. Agentlik bu məsələ ilə əlaqədar aparılan təbliğat-təşviqat işlərini də genişləndirir. Maarifləndirici məlumatlar, bukletlər və videoçarxlar hazırlanaraq ictimaiyyətə təqdim olunur. Aprelin 26-da isə ADA Universitetində “Qida Təhlükəsizliyi” Simpoziumu təşkil ediləcək.