“Ziraat Bank Azərbaycan” 2023-cü ilin ikinci rübünə dair maliyyə hesabatlarını yayımlayıb. Hesabata əsasən Bank ilin əvvəlindən başlayan müsbət artım dinamikasını davam etdirərək müştərilərinin etimadını qazanmağa davam edib.

Dərc edilmiş hesabatlara əsasən, bankın kredit portfeli ötən ilin müvafiq dövrü ilə müqayisədə 20,4 faiz artaraq 348 milyon manata çatıb. Portfelin mühüm hissəsini Bankın prioritet istiqamətlərindən olan və real sektora dəstəyini göstərən biznes kreditlər təşkil edib. Belə ki, 2023-cü ilin 2-ci rübündə Bankın real sektorun maliyyələşdirilməsinə ayırdığı vəsaitlər 335 milyon manatı keçib. Bankın depozit portfeli üzrə də əhəmiyyətli artım müşahidə edilib. Təqdim edilən maliyyə nəticələrinə görə 2023-cü ilin ilk 6 ayında müştərilərin banka etibar etdiyi vəsaitlər ötən ilin ilk altı ayı ilə müqayisədə 98,6 faiz artaraq 452 milyon manatı artıq olub. Bankın əməliyyat mənfəəti də ötən ilin müvafiq dövrü ilə müqayisədə 15.4 faiz artaraq 10 milyon manatı keçib.
Maliyyə hesabatına əsasən, bank 2023-cü ilin ilk altı ayı ərzində 4.128 milyon manat xalis mənfəət əldə edib. Bankın uğurları bununla da bitmir. Belə ki, ötən ilin müvafiq dövrü ilə müqayisədə Bankın aktivləri 52.1 faiz artaraq 670 milyon manatı keçib.
“Ziraat Bank Azərbaycan” ASC, Türkiyə Respublikasına məxsus, 159 illik tarixə malik olan “Ziraat Maliyyə Qrupu”nun tərkib hissəsidir və Azərbaycan Respublikasının Mərkəzi Bankı tərəfindən verilmiş 30.12.2014-cü il tarixli 255 nömrəli lisenziya əsasında fəaliyyət göstərir. Bank korporativ və pərakəndə bankçılıq sahəsində məhsul və xidmətlərini Bakı, Gəncə və Sumqayıt şəhərlərində yerləşən ümumi 7 filialı ilə yanaşı, rəqəmsal satış və xidmət platformaları üzərindən də müştərilərə təqdim edir. Bankın təqdim etdiyi məhsul və xidmətlər haqqında daha ətraflı məlumatı, Bankın feysbuk, instaqram, tviter, linkedin, yutub sosial media hesablarından və ya *9229 qısa nömrəsinə zəng edərək əldə edə bilərsiniz.