Bakı, 17 iyul, AZƏRTAC

İyulun 17-də Qafqaz Müsəlmanları İdarəsinin sədri şeyxülislam Allahşükür Paşazadə ölkəmizdə səfərdə olan Rumıniya müftisi Murad Yusif ilə görüşüb.
QMİ-nin mətbuat xidmətindən AZƏRTAC-a bildirilib ki, səmimi qardaşlıq şəraitində keçən görüşdə şeyxülislam A.Paşazadə qonağı Azərbaycanda dövlət-din münasibətlərinin yüksək səviyyəsi, ölkəmizdəki multikultural dəyərlər, konfessiyalararası anlaşma və harmoniya mühiti barədə məlumatlandırıb. Azərbaycanın 44 günlük Vətən müharibəsində qazandığı Zəfərdən sonra azad Qarabağda və Şərqi Zəngəzurda aparılan geniş quruculuq işləri, əzəli ərazilərimizə davam edən qayıdış prosesi barədə məlumat verən QMİ sədri erməni işğalçılarının törətdikləri vandallıqların miqyası barədə qonağa ətraflı məlumat verdi, dini-mənəvi abidələrimizin yenidən qurulması, bərpası istiqamətində dövlət tərəfindən görülən misilsiz işlərdən danışıb. Rumın müftisinin Azərbaycanda keçirilən Dünya dini liderlərinin II Bakı Sammitində iştirakçı olduğunu xatırladan A.Paşazadə növbəti Sammitə hazırlıq işlərinin getdiyini və rumın müftisini bu forumda da görmək istədiklərini qeyd edib.
Rumıniya müftisi Murad Yusif Azərbaycanda səfərdə olmaqdan və müdrik din xadimi kimi ehtiram bəslədiyi şeyxülislam A.Paşazadə ilə görüşmək fürsətindən olduqca məmnun olduğunu ifadə edib. Qonaq dost ölkələrimiz arasında əlaqələrin inkişafının dini-mənəvi sahədə də ənənəvi münasibətlərin dərinləşməsi üçün münbit zəmin yaratdığından şad olduğunu bildirərək, QMİ sədrini Rumıniyaya səfərə dəvət etməkdən şərəf duyduğunu xüsusi qeyd edib.
Görüşdə Rumıniyanın Azərbaycandakı səfiri Vasile Soare, Rumıniya parlamentinin deputatı Əhməd Varol iştirak ediblər.
Qonaqlara xatirə hədiyyələri təqdim olunub.