Bakı, 11 iyul, AZƏRTAC

Hökumət, vətəndaş cəmiyyəti və özəl sektor tərəfdaşları İqtisadi və Sosial Şura (ECOSOC) tərəfindən Nyu-Yorkda təşkil olunan tədbirdə on yeddi Dayanıqlı İnkişaf Hədəfinin (SDGs) yenidən canlandırılması yollarını müzakirə etmək üçün bir araya gəliblər.
AZƏRTAC BMT-nin saytına istinadla xəbər verir ki, 2015-ci ildə insanlar və planet üçün razılaşdırılmış iddialı hədəflər toplusunun həyata keçirilməsi prosesi COVID-19 pandemiyası və artan qlobal böhranlar nəticəsində pozulub. SDG-nin 2030-cu il gündəliyinin qəbul edilməsindən sonra dünya əhəmiyyətli dəyişikliklərə məruz qalıb və geosiyasi gərginliklərin daha da kəskinləşdiyi maliyyə, enerji, ərzaq və humanitar uğursuzluqlar səbəbindən onun irəliləyişi geri qalır.
Davamlı İnkişaf üzrə Yüksək Səviyyəli Siyasi Forum (HLPF) 2030-cu il gündəliyinə nail olmaq üçün qlobal bərpa prosesini sürətləndirmək yollarına diqqət yetirərək 2023-cü ilin sentyabrına planlaşdırılan mühüm SDG Sammiti üçün zəmin yaradacaq. HLPF-nin açılış sessiyasında çıxış edən Bolqarıstanın BMT-dəki nümayəndəsi və ECOSOC-un hazırkı prezidenti xanım Laçezara Stoyeva bu illik forumu sammit üçün siyasi impuls yaratmaq, eləcə də həll edilməli olan əsas siyasət prioritetlərini müəyyən etmək imkanı kimi xarakterizə edib.
Forum öz işini iki əsas sənəd üzərində quracaq: 2023-cü il Qlobal Davamlı İnkişaf Hesabatı və BMT Baş katibinin SDG Tərəqqi Hesabatının Xüsusi Buraxılışı. Həmişə olduğu kimi, bir neçə Dayanıqlı İnkişaf Hədəflərinin ətraflı təhlili aparılacaq, bu dəfə təmiz su və kanalizasiya ilə bağlı, əlverişli və təmiz enerji üzrə, sənaye, innovasiya və infrastruktura dair, dayanıqlı şəhərlər və icmalarla əlaqədar xüsusi sessiyalar keçiriləcək.
ECOSOC-un prezidenti qeyd edib ki, gəncləri müzakirələrə daxil etmək üçün xüsusi səy göstəriləcək. "Bizim üzləşdiyimiz çətinliklərlə mübarizə aparmaq üçün onların istedadına, enerjisinə və fədakarlığına ehtiyacımız var", -deyə o vurğulayıb.
Forumda 39 ölkənin nümayəndələrinin dayanıqlı inkişaf hədəflərinin həyata keçirilməsinə dair hesabatları təqdim ediləcək.