Bakı, 3 iyul, AZƏRTAC

Azərbaycan Respublikasının energetika naziri Pərviz Şahbazov OPEC-in “Dayanıqlı və inklüziv energetika keçidinə doğru” mövzusunda 8-ci beynəlxalq seminarında iştirak edəcək.
AZƏRTAC OPEC-ə istinadla xəbər verir ki, seminar iyulun 5-6-da Vyanada (Avstriya) keçiriləcək.
Seminarın proqramına əsasən, P. Şahbazov iyulun 5-də keçirilməsi planlaşdırılan “Bazarın sabitliyi və enerji təhlükəsizliyi” adlı nazirlər sessiyasında iştirakçı qismində elan edilib.
Sessiyanın iştirakçıları siyahısında, həmçinin 2023-cü ildə OPEC konfransının prezidenti, Ekvatorial Qvineyanın mədənçilik və karbohidrogenlər naziri Antonio Oburu Ondo, BƏƏ-nin energetika və infrastruktur naziri Suhail bin Məhəmməd əl Mazrui və nigeriyalı nümayəndə (daimi nümayəndə, Nigeriyanın Neft Ehtiyatları Nazirliyi) Qabriel Tanimu Aduda yer alıblar.
Qeyd edək ki, OPEC-in 8-ci beynəlxalq seminarı energetika keçidi ilə bağlı enerji təhlükəsizliyi, texnoloji innovasiyalar, ekoloji məsələlər, davamlı inkişaf, enerji siyasəti, eləcə də qlobal iqtisadiyyatda genişmiqyaslı tendensiyalar kimi əsas məsələlərə həsr olunacaq.
OPEC 1969-cu ildən bəri seminarlar təşkil edir. Lakin hazırkı beynəlxalq seminarlar silsiləsindən olan ilk seminar 2001-ci ildə keçirilib, onun ardından isə 2004, 2006, 2009, 2012, 2015 və 2018-ci illərdə növbəti iterasiyalar gəlib.