Bakı, 19 iyun, AZƏRTAC

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin və Qara Dəniz İqtisadi Əməkdaşlıq Təşkilatının (QDİƏT) Baş katibliyinin birgə təşkilatçılığı ilə İnstitusional İslahatlar və Yaxşı İdarəçilik üzrə İşçi Qrupun “Dövlət xidmətlərinin çatdırılmasında innovasiyaların rolu” mövzusunda vebinar keçirilib.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İctimaiyyətlə əlaqələr şöbəsindən AZƏRTAC-a verilən məlumata görə, məqsəd dövlət xidmətlərinin çatdırılmasında innovasiyaların roluna dair məlumat mübadiləsinin aparılması, dövlət-özəl tərəfdaşlığının əhəmiyyətinin vurğulanması və dövlət sektorunda innovasiyaların tətbiqinə dair məlumatlılığın aparılması sahəsində sessiyaların təşkil olunmasıdır.
Agentliyin sədr müavini Ceyhun Salmanov dövlət xidmətlərinin göstərilməsində innovasiyaların vacibliyi, eləcə də xidmət sahəsində keyfiyyətin artırılmasına dair görülən işlər barədə ətraflı məlumat verib.
Tədbirdə agentliyin qabaqcıl fəaliyyət istiqamətləri ilə yanaşı, Əmək və Əhalinin Sosial Müdafiəsi Nazirliyinin və QDİƏT-ə üzv dövlətlərin nümayəndələrinin də müvafiq sahələr üzrə birgə təcrübə mübadiləsi aparılıb.
Vebinar çərçivəsində təşkil olunan sessiyalarda innovasiyalar, xidmətlərin təşkili və beynəlxalq əməkdaşlıq kimi əhəmiyyətli sahələrdəki fəaliyyət barədə iştirakçılarla geniş müzakirələr aparılıb, suallar cavablandırılıb.
“ASAN xidmət” müvafiq sahələr üzrə qabaqcıl təcrübəsinə əsasən QDİƏT-in İnstitusional İslahatlar və Yaxşı İdarəçilik İşçi Qrupuna yenidən 2023–2025-ci illər üçün ölkə üzrə koordinator vəzifəsini yerinə yetirməyə layiq görülüb.