Ağdam, 29 mart, AZƏRTAC

Ailə, Qadın və Uşaq Problemləri üzrə Dövlət Komitəsinin Ağdam Uşaq və Ailələrə Dəstək Mərkəzinin(UADM), Ağdam Məşğulluq Mərkəzinin və Kiçik Orta Biznesin Dostunun (KOB Dostu) birgə təşkilatçılığı ilə Qadın, İnkişaf və Müəssisə Qruplarının üzvləri və icma sakinləri (qadınlar) üçün maliyyə savadlılığının artırılması istiqaməti üzrə “Ailə büdcəsinin idarə edilməsi” mövzusunda maarifləndirici seminar keçirilib.
AZƏRTAC-ın bölgə müxbiri xəbər verir ki, seminarda Ağdam UADM-in baş mühasibi Çingiz Hüseynov, Ağdam şəhər inzibati ərazi dairəsi üzrə nümayəndəliyin baş mühasibi Anar Muradov, Məşğulluq Mərkəzinin əməkdaşı Azər Salahov, KOB Dostunun əməkdaşı Həsən Cəlalzadə tərəfindən ailə büdcəsinin idarə edilməsi, qənaət və onun məqsədləri, gəlirlər və xərclər, xərclərin idarə edilməsi, lüzumsuz xərclər, kredit və onun ehtiyaclara uyğun sərfiyyatı barədə ətraflı məlumat verilib.
Qarşılıqlı müzakirə şəklində keçirilən seminarda iştirakçı ailələrin təcrübələri dinlənilib, onları maraqlandıran suallar cavablandırılıb.