Masallı, 20 yanvar, İlkin Adıyev, AZƏRTAC

Masallıda 20 Yanvar şəhidlərinin anım günü rayon mərkəzində və ayrı-ayrı yaşayış məntəqələrində keçirilən tədbirlərlə yadda qalıb.
AZƏRTAC-ın bölgə müxbiri xəbər verir ki, bu gün şəhərdəki “Qəhrəmanlar parkı - Şəhidlər abidə kompleksi”ndə 20 Yanvar faciəsinin 33-cu ildönümü ilə əlaqədar ümumrayon anım mərasimi keçirilib. Xalqımızın and yerinə çevrilən şəhidlərimizin məzarları ziyarət edilib, xatirələri ehtiramla yad olunub.
Ziyarətə gələn insanları, minlərlə rayon sakinini bir amal birləşdirirdi: Azadlığımız, müstəqilliyimiz uğrunda canından keçənlərin xatirəsini yad etmək, onların haqq işinin müdafiəçisi olduğunu bildirmək.
Anım mərasiminin iştirakçıları 20 Yanvar şəhidlərinin abidəsi önünə təzə tər qərənfillər düzərək, şəhidlərin ruhunu ehtiramla yad ediblər.
Eyni zamanda, rayon ərazisində matəm əlaməti olaraq Dövlət bayrağı endirilib, saat 12:00-da şəhidlərin xatirəsi bir dəqiqəlik sükutla yad edilib, nəqliyyat vasitələrində səs siqnalları verilib.