Serbiya və Kosovo rəhbərləri Brüssel görüşündə razılığa gələ bilməyiblər
Belqrad, 22 noyabr, AZƏRTAC
Serbiya Prezidenti Aleksandr Vuçiç və Kosovonun Baş naziri Albin Kurti noyabrın 21-də Brüsseldə keçirilən görüşdə razılığa gələ bilməyiblər.
AZƏRTAC xəbər verir ki, Avropa İttifaqının vasitəçiliyi ilə iki ölkə arasındakı gərginliyi azaltmaq məqsədilə keçirilən görüşdə Aİ-nin xarici siyasət və təhlükəsizlik məsələləri üzrə Ali nümayəndəsi Cozef Borel də iştirak edib. C.Borel görüşdə tərəflərin gərginliyi azaltmaq üçün heç bir həll yolu tapmadığını bildirib.
Şəxsiyyət vəsiqəsi və avtomobil nömrə nişanları ilə bağlı yaranan böhran bir müddətdir Serbiya və Kosovo arasında gərginliyə səbəb olub.
Xatırladaq ki, iyulun sonunda Kosovo hökuməti avqustun 1-dən etibarən Serbiya şəxsiyyət vəsiqəsinə sahib şəxslərin Kosovoya daxil olmaları və ölkədən çıxmaları üçün müvəqqəti bəyannamə blanklarının verilməsinə, həmçinin Serbiya tərəfindən Kosovodakı serblərə verilmiş avtomobil nömrə nişanlarının Kosovoya məxsus nömrələrlə dəyişdirilməsinə qərar verib. Kosovodakı serblər buna etiraz edərək ölkənin şimalındakı sərhəd-keçid məntəqələrini bağlayıb və iki ölkə arasında gərginlik yaşanıb. Kosovo hökuməti qaydaların tətbiqini sentyabrın 1-dək təxirə salmaq qərarına gəlib. Daha sonra Kosovo tərəfi avtomobil nömrə nişanlarının yenidən qeydiyyatı prosesinin 2023-cü ilin aprel ayınadək təxirə salındığını, lakin noyabrın 21-dən etibarən bu nəqliyyat vasitələrinin sahiblərinin cərimələnəcəyini bildirib.
Bu gündən etibarən Kosovonun hüquq-mühafizə orqanları avtomobillərini Serbiyanın dövlət nömrə nişanı ilə idarə edən vətəndaşları cərimələməyə başlayıb.
Nihad Budaqov
AZƏRTAC-ın xüsusi müxbiri
Belqrad
Zaxarova: ABŞ-ın Ukrayna, İsrail və Tayvana yardımı böhranı daha da dərinləşdirəcək
Bayden: Ukraynaya yardım döyüş meydanında təcili ehtiyacların ödənilməsi üçün zəruridir
ABŞ Konqresi Ukraynaya 61 milyard dollarlıq yardıma dair qanun layihəsini qəbul edib
Yaponiyada 2 hərbi helikopterlə əlaqə kəsilib
Zelenski: Ukrayna ABŞ-la təhlükəsizlik zəmanəti üzrə razılaşmaya yaxınlaşır