Naxçıvan, 18 noyabr, AZƏRTAC

Naxçıvan Muxtar Respublikası Ağciyər Xəstəlikləri Dispanseri muxtar respublika əhalisi arasında vərəm xəstəliyinin erkən aşkarlanması, müalicəsi və profilaktikası istiqamətində həyata keçirdiyi tədbirləri davam etdirir.
AZƏRTAC-ın Naxçıvan bürosu xəbər verir ki, noyabrın 1-dən start verilən tibbi müayinələrin məqsədi vərəmin erkən diaqnostikası və onun qarşısının alınmasından ibarətdir.
Növbəti müayinə Naxçıvan şəhər 5 nömrəli tam orta məktəbin IX-XI sinif şagirdləri arasında aparılıb, onlardan 165-i flüoroqrafiya müayinəsindən keçib. Məktəblilər arasında xəstə aşkar olunmayıb.
Aparılan tədbirlərin davamı olaraq dispanserin həkim briqadası səyyar flüoroqrafiya ilə Naxçıvan şəhər 7 nömrəli tam orta məktəbdə də olub, 74 şagird flüoroqrafiya müayinəsindən keçib. Həkimlər tərəfindən məktəblilər arasında maarifləndirici söhbətlər aparılıb.
Qeyd edək ki, ildə 2 dəfə aparılan profilaktik müayinə zamanı gizli xəstəliklər vaxtında aşkar edilir, ehtiyac yaranarsa, ətraflı müayinə üçün yeniyetmələr stasionara cəlb olunurlar. Flüoroqrafik tibbi müayinələr dekabrın 20-dək muxtar respublikanın bütün ümumtəhsil məktəblərində davam etdiriləcək.