Sumqayıt, 25 iyun, Ətrabə Rzayeva, AZƏRTAC

26 İyun – Ümumdünya Narkotiklər Əleyhinə Mübarizə Günü ilə əlaqədar Sumqayıt Regional Mədəniyyət İdarəsinin tabeliyində olan Sumqayıt şəhərinin Tarixi Muzeyində “Narkomaniya ilə mübarizə cəmiyyətin xilasıdır” mövzusunda tədbir keçirilib.
AZƏRTAC xəbər verir ki, Muzeyin direktoru Aygün Zülfüqarlı çıxışında narkomaniyanın mənəvi və əxlaqi dəyərlərə böyük zərbə vurduğunu, insanların həyat və sağlamlığına ciddi təhlükə yaratdığını, cinayətkarlığın artmasına səbəb olduğunu vurğulayıb. Qeyd edib ki, narkomaniyaya qarşı ümummilli mübarizə aparmaq lazımdır.
Aygün Zülfüqarlı Prezident İlham Əliyevin Sərəncamı ilə təsdiq edilən “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı”nın əhəmiyyətindən də danışıb.
Muzeyin əməkdaşı tərəfindən tədbir iştirakçılarına narkomanlığın cəmiyyətə və insanların sağlamlığına ziyanından bəhs edən “Narkomaniyaya yox deyək” mövzusunda mühazirə təqdim olunub.