Strasburq, 22 iyun, AZƏRTAC
Strasburqda Avropa Şurası Parlament Assambleyasının (AŞPA) yay sessiyasının 3-cü günü “Avropada antisemitizmin qarşısının alınması və ona qarşı mübarizə” adlı məruzənin müzakirəsi ilə başlayıb.
AZƏRTAC xəbər verir ki, AŞPA-nın yay sessiyasında ikinci günü Avropada təhlükəsizlik məsələsini müzakirə edən parlamentarilər, üçüncü gün “Avropada antisemitizmin qarşısının alınması və ona qarşı mübarizə”yə dair müzakirələrlə başlayıblar.
Sonra Yunanıstan Respublikasının Prezidenti Katerina Sakellaropuluyanın çıxışı olacaq və o, avropalı parlamentarilərin suallarını cavablandıracaq.
Günortadan sonra yay sessiyasının plenar iclası isveçrəli parlamentari Pyer-Alən Fridezin hazırladığı “Rusiya Federasiyasının Ukraynaya təcavüzü ilə əlaqədar humanitar nəticələr və daxili və xarici miqrasiya”, ukraynalı Mariya Mezentseva və isveçrəli Sibel Arslanın birgə hazırladığı “Müşayiət olunmayan və ayrılmış miqrant və qaçqın uşaqların müdafiəsi və alternativ qayğısı”, ukraynalı Yevheniya Kravçuk və isveçli Boriana Abergin birgə hazırladığı “Sülh barışığında qadınlar üçün ədalət və təhlükəsizlik” adlı məruzələrin müzakirələri ilə davam edəcək. Məruzələr müzakirələrlə müşayiət olunacaq. Avropalı parlamentarilər müzakirə olunan məsələlərlə bağlı tövsiyə və təkliflərini səsləndirəcəklər. AŞPA-nın yay sessiyasının üçüncü günü yerli vaxtla saat 20:00-dək davam edəcək.

Şəhla Ağalarova
AZƏRTAC-ın xüsusi müxbiri
Strasburq