Bakı, 30 may, AZƏRTAC

Pakistan Senatı Azərbaycanla diplomatik əlaqələrin 30-cu ildönümündə Xocalı soyqırımını pisləyən qətnaməni yekdilliklə qəbul edib.
AZƏRTAC xəbər verir ki, Senat Azərbaycan Respublikası ilə Pakistan İslam Respublikası arasında diplomatik əlaqələrin qurulmasının 30-cu ildönümü münasibətilə səmimi təbriklərini çatdırıb.
Qətnamədə bildirilir ki, Senat Azərbaycan Respublikasının suverenliyinə, ərazi bütövlüyünə və beynəlxalq səviyyədə tanınmış sərhədlərinin toxunulmazlığına davamlı və sarsılmaz dəstəyi bir daha təsdiq edir və otuz ilə yaxın davam edən işğaldan sonra ərazilərinin azad olunması ilə nəticələnən 2020-ci ildəki tarixi Qələbəsini böyük sevinclə qeyd edir.
Sənəddə qeyd edilir ki, Senat uzunmüddətli və dəyişməz mövqeyini təsdiq etməklə yanaşı, Senatın Xarici Əlaqələr Komitəsi tərəfindən Xocalı soyqırımını pisləyən 2012-ci il 1 fevral tarixli qətnaməni bir daha təsdiq edir.
Vurğulanır ki, Senat Azərbaycan və Pakistanın iqtisadi əlaqələrin, ticarətin, sərmayələrin inkişafı, xalqlar arasında təmasların yaxşılaşdırılmasında, habelə ikitərəfli və çoxtərəfli əməkdaşlığın bütün aspektlərində atılan mühüm birgə addımları, tarixi dostluq əlaqələrindən qaynaqlanan bir-birinin rifahını və təhlükəsizliyini hərtərəfli dəstəklədiyini bir daha bəyan edir.