×
A
A
A
Sazlamalar

Naxçıvanda soyqırımı qurbanlarının əziz xatirəsinə həsr olunmuş ağacəkmə keçirilib

Naxçıvan, 2 aprel, AZƏRTAC

1918-ci ilin martında təcavüzkar erməni millətçiləri tərəfindən xalqımıza qarşı soyqırımı və deportasiya həyata keçirilib, Bakıda, Naxçıvanda, Qubada, Şamaxıda və digər bölgələrdə minlərlə insan qətlə yetirilib. Azərbaycanlılara qarşı törədilmiş soyqırımına ilk dəfə hüquqi-siyasi qiymət verən ümummilli liderimiz Heydər Əliyev deyib: “Qarşımızda duran əsas vəzifələrdən biri xalqımıza qarşı həyata keçirilən soyqırımı haqqında indiki və gələcək nəsillərdə möhkəm milli yaddaş formalaşdırmaq, bu faciələrə bütün dünyada siyasi və hüquqi qiymət verilməsinə nail olmaq, onun ağır nəticələrinin aradan qaldırılmasına və bir daha belə halların təkrar olunmamasına çalışmaqdır. Bunun üçün isə yalnız möhkəm və yenilməz milli birlik nümayiş etdirməliyik”. Dövlətimizin başçısı İlham Əliyevin rəhbərliyi ilə 44 günlük Vətən müharibəsində Azərbaycan xalqı mübarizliyini və yenilməzliyini bir daha nümayiş etdirdi, tarixi ədalət bərpa olundu, Zəfər qazanıldı.
Torpağa məhəbbət və bağlılıq isə onu qorumaqla yanaşı, həm də əkmək, zəhmətə qatlaşıb bol məhsul yetişdirməklə, bağlar, yaşıllıqlar salmaqla mümkün olur.
Naxçıvan Muxtar Respublikası Ali Məclisinin mətbuat xidmətindən AZƏRTAC-ın Naxçıvan bürosuna bildirilib ki, aprelin 2-də Naxçıvan Muxtar Respublikasında 31 Mart soyqırımı qurbanlarının əziz xatirəsinə həsr olunmuş ağacəkmə keçirilib, meyvə bağları və yaşıllıqlar salınıb.
Naxçıvan Muxtar Respublikası Ali Məclisinin, Nazirlər Kabinetinin, Ekologiya və Təbii Sərvətlər Nazirliyinin və “Naxçıvan Yaşıllaşdırma Xidməti” publik hüquqi şəxsin kollektivləri Duzdağ Fizioterapiya Mərkəzinə gedən yolun kənarındakı 3 hektar ərazidə keçirilən ağacəkmədə iştirak ediblər. Burada 2 hektar sahədə meyvə bağı salınıb, ərazidəki 1 hektar meyvə bağında isə bərpa əkini aparılıb.
Naxçıvan Muxtar Respublikası Ali Məclisinin Sədri Vasif Talıbov ağacəkmədə iştirak edib, meyvə tingləri əkib.
Bildirilib ki, cari ilin yazında muxtar respublikada 170 hektar sahədə yaşıllaşdırma tədbirləri aparılacaq, yeni meyvə bağları salınacaq, toxumla əkin aparılacaq.
Həmin gün muxtar respublikada soyqırımı qurbanlarının əziz xatirəsinə həsr olunmuş ağacəkmədə 20 minə yaxın sakin iştirak edib, 13 mindən artıq meyvə və meşə tingləri əkilib.

Siyasət 2022-04-02 20:02:00