Kamberra, 4 oktyabr, AZƏRTAC

Azərbaycan Ordusunun 30 ilə yaxın bir müddətdə erməni işğalı altında qalan torpaqları azad etməsi Avstraliyada yaşayan azərbaycanlıların da qəlbində qürur hissi doğurur.
AZƏRTAC xəbər verir ki, bu sözləri Avstraliyanın “ABC” radiosuna müsahibəsində Sidney şəhərində yaşayan gənc azərbaycanlı hüquqşünas Cesika Oyta deyib.
Radionun müxbirinin suallarını cavablandıran C.Oyta hadisənin tarixi və səbəbləri barədə ətraflı məlumat verib. Qafqaza gəlmə xalq olan ermənilərin tarixboyu Azərbaycan torpaqlarına göz dikdiyini vurğulayan avstraliyalı soydaşımız ötən əsrin 90-cı illərində erməni yaraqlılarının keçmiş SSRİ-nin dağılmasından istifadə edərək Dağlıq Qarabağı və ona bitişik 7 rayonu işğal etdiyini xatırladıb. Nəticədə bir milyon azərbaycanlı doğma ata-baba yurdlarından qovularaq məcburi köçkünə və qaçqına çevrilib. O qeyd edib ki, heç bir beynəlxalq təşkilat, dünya dövləti işğal olunan ərazidə elan edilən qondarma “Dağlıq Qarabağ respublikasını” tanımayıb. Əksinə, həmin ərazidə sonradan yerləşdirilən Ermənistan ordusu daim Azərbaycan ərazilərini atəş altında saxlayaraq təxribatlar törədib. Azərbaycan Ordusu da məhz son belə təxribatdan sonra mülki əhalinin təhlükəsizliyini təmin etmək üçün əks-hücuma keçib.
Azərbaycanın sülhsevər bir ölkə olduğunu vurğulayan C.Oyta buradakı bütün xalqların və dini konfensiyaların nümayəndələrinin sülh və əmin-amanlıq şəraitində yaşadığını xüsusi vurğulayıb. Ermənistandan fərqli olaraq, Azərbaycanın tolerant və çoxmədəniyyətli bir ölkə olduğunu qeyd edib.
Müxbirin qarşıdurma nəticəsində həm mülki əhali, həm əsgərlər arasında çoxsaylı itkilərin olması barədə sualını cavablandıran soydaşımız bildirib ki, 30 ilə yaxın bir müddətdə davam edən gərginliyin Azərbaycan xalqının səbrini daşırdığını, bununla yanaşı, məcburi köçkünlərin öz doğma ocaqlarına qayıtmaq üçün hər şeyə hazır olduqlarını bildirib. Deyib ki, torpaq bizim üçün müqəddəs anlayışdır və Azərbaycan xalqı heç vaxt ərazilərimizin düşmən tapdağı altında qalmasına razılaşmayacaq. Erməni ordusuna gəldikdə isə, əgər onlar başqasının torpağı uğrunda ölmək istəmirlərsə, onda işğal etdikləri ərazilərdən çıxıb getməlidirlər. Təbii ki, söhbət burada yaşamış mülki ermənilərdən getmir. Onlar bu ərazilərdə Azərbaycan qanunlarını, Azərbaycan hökumətini qəbul edərək yaşaya bilərlər.
Müsahibədə C.Oyta Avstraliya hökumətinə münaqişənin həlli ilə bağlı tutduğu ədalətli mövqeyinə və Dağlıq Qarabağ regionunu Azərbaycanın tərkib hissəsi kimi tanıdığına görə də minnətdarlığını bildirib.
Vüqar Ağayev
AZƏRTAC-ın xüsusi müxbiri
Kamberra