Bakı, 28 sentyabr, AZƏRTAC

Xəzər dənizinin Azərbaycan sektorunda Abşeron yarımadası ətrafında dayazsulu sahə (AYDS) daxilində kəşfiyyat qazma fəaliyyətləri üçün ətraf mühitə və sosial-iqtisadi sahəyə təsirin qiymətləndirilməsi (ƏMSSTQ) sənədinin layihə versiyasını müzakirə etmək üçün ictimaiyyətlə açıq virtual görüş keçiriləcək.
“BP Azerbaijan” şirkətindən AZƏRTAC-a bildirilib ki, bütün maraqlı tərəflər sentyabrın 30-da saat 14:00-dan 16:00-dək “Microsoft Teams” vasitəsilə onlayn rejimdə keçiriləcək açıq virtual görüşdə iştirak etməyə dəvət edilir.
ƏMSSTQ sənədlərinin layihə versiyası və rəy formaları avqustun 28-dən BP-nin veb-saytına yerləşdirilib və onları aşağıdakı link vasitəsilə yükləmək mümkündür: https://www.bp.com/az_az/azerbaijan/home/news/environmental-and-social-documentation/shallow-water-absheron-peninsula.html
Görüş zamanı BP tərəfindən təqdimatlar ediləcək və ƏMSSTQ-in layihə versiyası haqqında auditoriyanın sualları cavablandırılacaq, həmçinin şərh və rəylər dinləniləcək. Rəy və təklifləri, həmçinin “www.bp.com/Azerbaijan” veb-saytına daxil olmaqla və ya “[email protected]” elektron ünvanına göndərməklə də təqdim etmək olar.