Azərbaycan Dövlət
İnformasiya Agentliyi

A
A
A
Sazlamalar

Almaniyada Xocalı soyqırımının ildönümünə həsr olunan simpozium keçirilib

Berlin, 6 mart, AZƏRTAC

Azərbaycanın Almaniyadakı səfirliyi, Alman-Azərbaycan Forumu, Almaniya Atlantik Cəmiyyətinin birgə təşkilatçılığı və SOCAR-ın Almaniya nümayəndəliyinin dəstəyi ilə Xocalı soyqırımının ildönümü ilə əlaqədar Almaniya Bundestaqının nəzdindəki Alman Parlament Cəmiyyətində 8-ci “Cənubi Qafqazda sabitlik və təhlükəsizlik. Almaniya-Azərbaycan əməkdaşlığının perspektivləri” simpoziumu keçirilib.
AZƏRTAC xəbər verir ki, Alman-Azərbaycan Forumunun sədri, keçmiş dövlət katibi Hans-Eberhard Şlayer simpoziumu açaraq Xocalı qətliamı və Ermənistan-Azərbaycan münaqişəsi, eləcə də Azərbaycan-Almaniya münasibətlərinin müxtəlif aspektləri barədə danışıb.
Azərbaycanın Almaniyadakı səfiri Ramin Həsənov tədbirdə çıxış edərək ikitərəfli əlaqələrdən danışıb. O, Ermənistan-Azərbaycan Dağlıq Qarabağ münaqişəsinin həllinin də bu münasibətlərin gündəliyində yer alan mühüm məsələ olduğunu qeyd edib. Bildirib ki, münaqişənin həllinə dair nikbinliyin olmamasının səbəbi Ermənistanın öz işğalçılıq siyasətindən əl çəkmək istəməməsidir. Münxen Təhlükəsizlik Konfransı çərçivəsində Prezident İlham Əliyev və baş nazir Nikol Paşinyan arasında keçirilmiş ictimai debatlara istinad edən səfir Azərbaycan Prezidentinin münaqişəyə dair həqiqətləri dünya ictimaiyyətinə çatdırdığını, Ermənistanın hazırkı iqtidarının isə yalan və populizm üzərində qurulmuş ritorika ilə ictimaiyyəti aldatmağa və status-kvonu saxlamağa çalışdığını vurğulayıb.
R.Həsənov bildirib ki, torpaqları işğal olunmasına və bir milyondan artıq qaçqın və məcburi köçkünü olmasına baxmayaraq, Azərbaycan münaqişənin sülh yolu ilə həll olunmasına çalışır, lakin Ermənistan sülhə hazır deyil. İyirmi səkkiz il əvvəl Xocalıda Azərbaycan xalqına qarşı soyqırımı cinayəti törətmiş şəxslər nəinki öz cəzalarını almayıblar, onlar hətta sonradan müxtəlif yüksək vəzifələrə yiyələniblər. Səfir Almaniya və Avropa İttifaqını Ermənistanı Azərbaycanla sülhə, öz qonşuları ilə konstruktiv davranışa, eləcə də qonşu ölkələrə qarşı ərazi iddialarından əl çəkmək üçün inandırmağa çağırıb. Bildirib ki, işğala son qoyulması və azərbaycanlıların öz evlərinə qayıtması münaqişə tərəfləri arasında etimadın qurulmasında həlledici ola bilər. R.Həsənov vurğulayıb ki, münaqişənin tezliklə həlli, ilk növbədə, aclıq və səfalətdən əziyyət çəkən Ermənistanın, eləcə də bütün regionun və region ölkələrinin tərəfdaşlarının marağında olmalıdır.
Bundestaqın vitse-prezidenti Tomas Opperman tədbirdə çıxış edərək Xocalıda baş verənləri insanlığın faciəsi adlandırıb. O, Ermənistan-Azərbaycan Dağlıq Qarabağ münaqişəsinin həlli yollarının araşdırılmalı olduğunu, Almaniyanın bu prosesə dəstək verməyə hazır olduğunu qeyd edib. T.Opperman, həmçinin Azərbaycanın mürəkkəb geosiyasi mövqedə yerləşdiyini və regionda təhlükəsizliyin təmin edilməsinin Almaniyanın maraqlarında olduğunu vurğulayıb.
Azərbaycan-Almaniya münasibətlərini səciyyələndirən T.Opperman bu münasibətlərin 200 illik tarixə malik olduğunu, ölkələrimiz arasında iqtisadi və mədəni əlaqələrin yüksək səviyyədə olduğunu deyib, eləcə bunun daha da dərinləşdirilməsi üçün mövcud olan imkanları qeyd edib. Bundestaqın vitse-prezidenti Azərbaycandakı multikulturalizm və dini tolerantlığı yüksək qiymətləndirib, ölkəmizi bu mənada digər ölkələr üçün nümunə adlandırıb.
Tədbirdə çıxış edən Almaniyanın Xarici İşlər Nazirliyinin Cənubi Qafqaz və Mərkəzi Asiya şöbəsinin müdiri Anke Konrad sözügedən simpoziumun Xocalı qurbanlarının anımı məqsədilə keçirildiyini qeyd edib. Bildirib ki, Xocalı faciəsi Dağlıq Qarabağ münaqişəsinin ən qanlı səhifələrindən biridir. Münaqişənin həllinin iqtisadi inkişaf və insanların rifahı üçün yaradacağı imkanlardan bəhs edən A.Konrad son zamanlar ATƏT-in Minsk qrupu çərçivəsində Ermənistan və Azərbaycan arasında görüşlərin artmasını məmnunluqla qeyd edib, eyni zamanda, tezliklə məzmunlu danışıqların başlanmasına ümid etdiklərini vurğulayıb.
İki ölkə arasında iqtisadi, humanitar, vətəndaş cəmiyyəti sahəsində münasibətlərə toxunan almaniyalı diplomat Azərbaycanı Almaniyanın regionda əsas iqtisadi tərəfdaşı adlandırıb, “Cənubi Qaz Dəhlizi” layihəsinin əhəmiyyətini vurğulayıb, region ölkələri arasında yalnız Azərbaycanda Alman Xarici Ticarət Palatasının fəaliyyət göstərdiyini, Almaniyanın ölkəmizdə həyata keçirilən müxtəlif layihələrə dəstək verdiyini bildirib.
Daha sonra simpoziumda Bundestaqın deputatları - Xarici işlər komitəsinin sədr müavini, Almaniyanın ATƏT Parlament Assambleyasında nümayəndə heyətinin üzvü Daniela De Ridder, Xristian-Demokrat/Xristian-Sosialist İttifaqı fraksiyasının Şərq Tərəfdaşlığı ölkələri üzrə məruzəçisi, Xarici işlər komitəsinin üzvü Nikolas Löbel, Almaniya-Cənubi Qafqaz parlament qrupunun üzvü Eberhard Qinqer və jurnalist Birqit Vetselin iştirakı ilə panel müzakirələr keçirilib.
Panelin aparıcısı, Boxum Universitetinin beynəlxalq hüquq üzrə professoru Hans-Yoaxim Hayntse münaqişənin hüquqi aspektlərinə toxunub. Xocalıda baş verənləri soyqırımı adlandıran alman professor bu cinayəti törədənlərin cəzalandırılmasının həm hüquqi nöqteyi-nəzərdən zərurət, həm də cinayət qurbanları qarşısında mənəvi borc olduğunu diqqətə çatdırıb. Aparıcı, həmçinin Almaniya təcrübəsinə istinadən hər bir ölkənin öz neqativ keçmişinə də obyektiv qiymət verməli olduğunu vurğulayıb.
N.Löbel Azərbaycan torpaqlarının Ermənistan tərəfindən işğal olunduğunu və bu faktın BMT Təhlükəsizlik Şurasının qətnamələrində öz əksini tapdığını vurğulayıb. Deputat qeyd edib ki, hazırkı status-kvo Almaniya üçün qəbuledilməzdir. Çünki regionda sabitliyin olması Almaniyanın strateji marağındadır və Azərbaycan Almaniyanın etibarlı tərəfdaşıdır.
D.De Ridder münaqişənin həllinə dəstək vermək üçün ATƏT Parlament Assambleyası çərçivəsində mövcud olan təşəbbüslərdən bəhs edib və şəxsən özünün bu proseslərin daha da sürətlənməsi üçün dəstək göstərməyə hazır olduğunu bildirib.
E.Qinqer təmsil etdiyi parlament dostluq qrupunun fəaliyyətindən və Azərbaycana səfər təəssüratlarından danışıb. Azərbaycanda gördüyü inkişaf, milli-mədəni müxtəliflik, ölkənin “Eurovision”, Avropa Oyunları, Formula 1 və sair kimi mötəbər tədbirlərə yüksək səviyyədə ev sahibliyi etməsinin layiqincə qiymətləndirilməli olduğunu vurğulayıb.
Jurnalist B.Vetsel Azərbaycanı müxtəlif mədəniyyətlərin kəsişdiyi ölkə və tolerantlıq nümunəsi adlandırıb. Həmçinin Azərbaycanın Avropa İttifaqının etibarlı enerji tərəfdaşı olduğunu qeyd edib, Cənub Qaz Dəhlizi və Trans-Xəzər Beynəlxalq Nəqliyyat Dəhlizinin əhəmiyyətindən bəhs edib, onların reallaşmasında ölkəmizin rolunu vurğulayıb, eləcə də bu layihələrin kənar təhlükələrdən qorunması üçün Avropa İttifaqının üzərinə məsuliyyət götürməli olduğunu bildirib.
Sonra iştirakçılar sualları cavablandırıblar.
Simpoziumda tədbir iştirakçılarına Xocalı soyqırımı və Ermənistan-Azərbaycan Dağlıq Qarabağ münaqişəsinə dair materiallar təqdim olunub.
Tədbirdə Bundestaqın deputatları, Almaniyanın Xarici İşlər Nazirliyi və digər hökumət qurumlarının nümayəndələri, siyasi, elmi və mədəni dairələrin, KİV-lərin, Almaniyada akkreditə olunmuş diplomatik nümayəndəliklərin, Azərbaycan diasporunun təmsilçiləri və Azərbaycanın Almaniyadakı səfirliyinin əməkdaşları iştirak ediblər.

Vüqar Seyidov
AZƏRTAC-ın xüsusi müxbiri
Berlin

Siyasət 2020-03-06 19:14:00